Ukaguzi wa ujenzi wa madarasa 120 Manispaa ya Temeke

Posted on: January 19th, 2020

DC  LYANIVA AWATAKA WALIOPEWA TENDA YA  UJENZI WA MADARASA MANISPAA YA TEMEKE KUKAMILISHA KWA  WAKATI.

Mkuu wa Wilaya ya Temeke Mhe Felix Lyaniva amewataka waliopewa tenda ya ujenzi wa madarasa katika Shule za Sekondari Manispaa ya Temeke kujenga usiku na mchana ili itakapofika tarehe 13 /02/2019 madarasa hayo yawe tayari kwa Matumizi.

Ameyasema hayo wakati alipotembelea shule mbalimbali za Sekondari ambazo madarasa hayo yanajengwa katika Manispaa hiyo Jijini Dar es Salaam.

Katika picha ni mwonekano wa Ujenzi wa madarasa unaoendelea katika shule za Sekondari Manispaa ya Temeke.

Mkuu wa Wilaya katika ziara yake aliambatana na Katibu Tawala wa Wilaya ya Temeke Bi Bupe Mwakibete na baadhi ya wataalamu kutoka Manispaa, akiwa katika ziara hiyo alikagua ujenzi wa Madarasa 120 ambayo yanajengwa kwa lengo la kutatua changamoto za wanafunzi kukosa vyumba ya madarasa  kutokana na ongezeko kubwa la wanafunzi waliochaguliwa kujiunga na kidato cha kwanza Mwaka huu 2020.

Mhe Mkuu wa Wilaya aliagiza kwa kila mtumishi aliyepewa jukumu la kusimamia katika miradi hiyo ya Ujenzi wa Madarasa kuhakikisha anatimiza wajibu wake hategemei kutembelea site asimkute msimamizi au anakuta hakuna kinachofanyika anatamani kuona zoezi hilo linafanyika kwa haraka lakini kwa kuzingatia ubora wa hali ya juu.

"Zingatieni miongozo ya Ujenzi ya TAMISEMI  kama maelekezo yanataka ujenzi wa Darasa usizidi milioni ishirini fanyeni hivyo" alisema Mh Lyaniva.

Mkuu wa Wilaya Mhe Felix Lyaniva akitoa maelekezo katika moja ya site ya ujenzi wa madarasa alipozuru wakati ziara yake.

Aidha Mkuu wa Wilaya ameridhishwa na maendeleo ya ujenzi huo wa madarasa unaoendelea katika shule za Sekondari ambazo ni  Miburani,Kibasila,Taifa,Minazini,Kijichi, Changanyikeni,Mikwambe,Malela,Toangoma,Chamanzi, Charambe, Kingugi na Mbagala Sekondari ,  

Kwa ujumla ujenzi wa madarasa katika shule mbalimbali upo katika hatua ya msingi na baadhi ya shule katika linta mfano Ujenzi wa Maktaba na Madarasa matatu shule ya Sekondari Mikwambi.