UONGOZI WILAYA YA TEMEKE WAPOKEA MRADI WA MASUALA YA KIJINSIA KUTOKA UN WOMEN

Posted on: November 22nd, 2023

Na: Sweetbetter Njige -TMC Habari

Menejimenti ya halmashauri ya Manispaa ya Temeke leo Novemba 22, 2023 wakiongozwa na Mkuu wa wilaya Mhe. Sixtus Mapunda, pamoja na viongozi wa dini na taasisi mbalimbali za kijamii wamepokea mradi wa masuala ya kijinsia unaoendeshwa na taasisi ya UN Women utakaowezesha ushiriki wa wanawake na wasichana katika Uongozi na uchumi.

Sambamba na hilo Menejimenti wamepatiwa mafunzo Kutoka kwa wataalamu wa taasisi hiyo yanayolenga kujenga uelewa juu ya masuala ya kijinsia.

Akizungumza katika mafunzo hayo Mhe. Mapunda amesema ni muhimu jamii kutambua changamoto wanazokutana nazo wanawake ili kutambua namna sahihi ya kuwasaidia kufikia malengo yao hususani ya kiuongozi na kiuchumi

" 'Leadership' kwa mwanamke ni ngumu sana ukilinganisha na uhalisia uliopo (mifumo dume) anahitaji kushikwa mkono na kupewa nguvu muda mwingine kwa kupata tu mtu anayewaambia "unaweza" tunatambua wanawake ni viongozi wazuri lakini vipi kama huku nyuma walipitia mambo yatakayoharibu maisha yao kwa ujumla kutokana na jamii kukosa elimu kama hii" alisema Mhe. Mapunda

Kwa upande wake Mstahiki Meya wa Manispaa Mhe. Abdallah Mtinika ameipongeza taasisi ya UN Women kwa kazi kubwa wanayofanya kwa jamii na kuwahakikishia ushirikiano.

"Masuala ya jinsia ni mada muhimu kwa jamii, tunatakiwa kuyapa uzito, hata kama tutafanya miradi ya maendeleo bila kuwa na uelewa wa masuala ya kijinsia ikiwemo haki na wajibu itakua kazi bure. Niwaombe sana muendelee kutoa elimu inayofaa kwa jamii zetu" alisema Mstahiki Meya

Mradi wa Ushiriki wa wanawake na wasichana katika masuala ya uongozi na uchumi unaendeshwa katika mikoa sita Nchini na kwa mkoa wa  Dar es salaam unatekelezwa katika Wilaya tatu ikiwemo Temeke.