USHIRIKISHWAJI UNAENDELEA STENDI YA KIJICHI

Posted on: October 24th, 2022

Na; Sweetbetter Njige     

TMC Habari.

Katika jitihada za kuendelea kuboresha utendaji kazi wa stendi mpya ya Kijichi mwenyekiti wa kamati inayosimamia mchakato wa stendi hiyo ndugu Mkana Mkana kwa niaba ya mkurugenzi wa manispaa ndugu Elihuruma Mabelya amefanya kikao na wadau wa usafirishaji wakiwemo Mawakala na Makarani wa Makampuni ya Mabasi ili kuona ni namna gani wanaweza kushirikiana kuweka ufanisi katika Stendi hiyo mpya Kiutendaji.

Kikao hicho kimefanyika katika ukumbi wa kusubiria abiria uliopo stendi ya Kijichi leo Oktoba 24,2022, kimesaidia kupata mawazo kutoka kwa wadau hao ambapo mjumbe mmoja  ambaye ni karani wa kampuni ya Supafeo anayejulikana kama  Marijani alisema,

"Vikao kama hivi vina afya, na tunaimani mkiyafanyia kazi mapungufu madogo yaliyopo na mawazo ambayo kwa pamoja tutayaleta hapa, itasaidia kuwafanya abiria wazoee kutumia stendi hii".

Kikao hicho ni muendelezo wa vikao shirikishi vinavyofanywa na Uongozi wa manispaa ya Temeke katika kuhakikisha stendi ya Kijichi inafanya kazi kwa uwazi na ushirikiano wa pande zote.