Wadau wa Mazingira Temeke Wapewa Elimu ya Kudhibiti Taka.

Posted on: March 30th, 2021

Elimu hiyo imetolewa na Asasi isiyo ya kiserikali ya "Lawyers Enviroment Action Team" kupitia Kongamano la Wadau wa Mazingira,lililofanyika mwishoni mwa wiki,katika ukumbi wa Darlive uliopo eneo la  Zakhiem,kata ya Charambe,wilaya ya  Temeke.

Katika Kongamano hilo lililowashirikisha wadau wote muhimu wa mazingira ambao ni  Maafisa Mazingira,Maafisa Afya,Watendaji wa Kata,Watendaji wa Mitaa,Wenyeviti wa mitaa,mama Lishe na Wamachinga,Afisa wa LEAT wakili Baraka Thomas aliendesha mafunzo kuhusu maana ya taka,sheria mbalimbali zinazosimamia suala zima la utunzaji wa taka,aina za taka( hapa alielekeza kuhusu makundi ya taka),

Washiriki walielezwa juu ya madhara yanayoweza kutokea kutokana na kutodhibiti taka.Sambamba na hilo,muwezeshaji alielekeza kwamba udhibiti wa taka unaanzia katika hatua ya ukusanyaji wa taka,ambapo alisisitiza kwamba ili taka ziweze kudhibitiwa vizuri,ni lazima katika ukusanyaji,taka hizo zitenganishwe kulingana na makundi yake.

Aidha alisisitiza kwamba ni muhimu kwa wananchi kuwa na elimu ya udhibiti taka,kwani kumekuwepo na uchafuzi mkubwa wa mazingira,ambao mara nyingi unafanywa na wananchi kwa sababu tu, ya kutokuwa na ufahamu wa kwamba kila taka inapaswa kudhibitiwa ama kuteketezwa kwa usahihi kulingana na kundi lake.Hapa Wakili Thomas alitoa mfano wa taka za 'Plastic' ambapo alisema kwamba taka hizo hazitakiwi kuchomwa moto,wala kuzikwa,bali zinatakiwakufanyiwa urejereshaji ( recirclering) kwani zinapochomwa moto, moshi wake husababisha madhara ya kiafya kwa viumbe hai,na vilevile huwa haziishi zote,na zinapozikwa/ kufukiwa chini haziozi,badala yake,zinasabisha uharibifu kwenye ardhi.

Wakili Thomas alitoa angalizo kwa washiriki hao kuhusu madhara ya kutokutunza mazingira ,ambapo àlisema "elimu ya udhibiti wa taka ni muhimu sana katika kuwawezesha wananchi kuhifadhi mazingira ,kwa sababu tusipohifadhi mazingira ,kwa siku zijazo,kuna viumbe watapotea.Tunadhibiti taka kutunza uhai wetu sisi na wa watu wengine".

Katika hatua nyingine wakili Thomas  alianisha misingi/kanuni za kimazingira ambapo kanuni ya kwanza ni kuchukua tahadhari,kabla ya kuteketeza taka.Kanuni ya pili,anayechafua mazingira ni lazima alipe.Kanuni ya tatu,anazalisha taka anapewa jukumu kubwa kuhakikisha kwamba taka anazozalisha,ama kuingiza nchini bidhaa ambazo zitazalisha taka,apewe jukumu kubwa zaidi katika uhifadhi ama uteketezaji wa taka hizo.

LEAT kupitia mradi wake wa kulinda haki za kimazingira kwa wanawake,vijana, wasichana na jamii kwa ujumla kupitia kuwezesha jamii katika masuala ya kisheria jijini Dar es Salaam imekuwa ikitekeleza mradi huo kwa kufanya shughuli mbalimbali,miongoni mwa shughuli hizo,ni kuendesha mikutano ya wadau ya kila wilaya kujadili hali ya kimazingira kila baada ya miezi mitatu na kutoa mafunzo kwa wanajamii kuhusu mazingira.