Wajasiriamali Kivutio Nanenane Banda la Manispaa ya Temeke

Posted on: August 6th, 2019

Waziri wa mifugo na uvuvi Mhe. Luhaga Mpina akikagua kiatu kilichotengenezwa na kikundi cha SIMONS wakati alipotembelea banda la manispaa ya Temeke mwishoni mwa wiki. 

Wajasiriamali wa kikundi cha SIMONS group kinachojishughulisha na  utengenezaji wa bidhaa za ngozi, wamekuwa kivutio kikuwa kwa watu wanaotembelea banda la manispaa ya Temeke.Mvuto huo umedhihirishwa hasa na waziri wa Mifugo na uvuvi Mhe. Luhaga Mpina ambaye baada ya kuona ubora wa viatu vinavyotengenezwa na kikundi hicho, ameahidi kukipa  kazi ya kutengeneza viatu aina ya buti jozi 200.

Akizungumza mara baada ya kauli ya Mhe. Mpina ,fundi mkuu na mshauri wa kikundi hicho ndugu David Josia Magumba amesema tamko la Mhe. waziri limetutia moyo sana,  tunaamini kwamba oda hiyo itatuvusha pakubwa sana,nikizingatia kwamba bado tuna uhitaji mkubwa sana wa pesa ,pesa tunayoipata bado ni ndogo, kiwanda chetu kinahitaji maboresho makubwa .

Magumba amesema kwamba  mpaka sasa hawajawa na soko la kutosha la bidhaa zao ,hali ambayo inawasababisha kushindwa kuzalisha bidhaa zao kwa wingi. Amesema kwamba kwasasa soko  wanalolitegemea ni mteja mmoja mmoja,hali ya kuwa wanauwezo wakuzalisha  bidhaa kwa wingi.Magumba pia amesema kwamba jitihada zinafanyika kuzungumza na wafanyabiashara  wanaouza viatu kwa jumla na baadhi ya wamiliki wa shule ili waweze kupata soko la viatu kutoka kwao.Magumba amesema kwamba masoko wanayoyalenga  kwa sasa, ambako ndiko walikoelekeza nguvu ni wanafunzi,vyombo vya ulinzi na usalama, wauzaji wa jumla na viwanda.

Aidha Magumba ameishukuru Manispaa ya Temeke kwa kuwapa fursa ya kuwepo katika maonesho ya Nanenane kwa mara nyingine tena ambapo amesema kwamba uwepo wao kwenye maonesho hayo ni fursa nzuri kwao kujitangaza,kutanua wigo wao wa masoko,  unawawezesha  kuonesha uwezo walionao ,vilevile kuwahamsisha wengine kuwa na uthubutu wa kujiunga kwenye vikundi na  kuanzisha viwanda vidogo vidogo vya viatu,tofauti na ilivyo sasa ambapo watu wengi wanafikiri kwamba ili kuanzisha kiwanda cha viatu wanahitaji kuwa na mtaji mkubwa sana. Sambamba na shukrani hizo ,Magumba amemuomba Mkurugenzi mtendaji wa halmashauri ya manispaa ya Temeke, ndugu Lusubilo Mwakabibi awasaidie kuwatafutia masoko  ya viatu kwenye viwanda ,  kwenye jeshi la akiba la wilaya ( Mgambo) pamoja na shule.Sambamba na ombi hilo pia ameomba  kikundi chao kiwe na uwakilishi kwenye baraza la biashara la wilaya, ili kupitia  baraza hilo waweze kupata fursa zaidi ya kujitangaza.

Naye katibu wa kikundi,  ndugu  Sospeter Makunja  ametoa maoni yake ambapo amesema kwamba kama angepata nafasi ya kuonana na Mhe. Rais angemuomba awahimize Watanzania kupenda bidhaa zinazozalishwa hapa nchini.Amesema kwamba wakati umefika sasa kwa Watanzania kuondoa fikra kuwa bidhaa zinazozalishwa hapa nchini hazina ubora ,kwasababu  wapo Watanzania kama wao SIMONS, ambao wanauwezo wa kutengeneza bidhaa zenye ubora wa kiwango cha juu kabisa.

Makunja  ameongeza kwa kusema kuwa wao kama Kikundi cha SIMONS wanaamini  kwamba kazi zao ni bora sana kwani hata baada ya kupata kupata ujuzi,  walijifungia kwa muda wa mwaka na miezi minne wakiwa wanabuni na kutengeneza bidhaa zao kabla hawajatoka nje rasmi kuzitambulisha kazi zao na kuendelea na uzalishaji.Na wamekuwa wakishiriki mafunzo mara kwa mara ili kujiongezea maarifa na ujuzi. 

Kikundi cha SIMONS  kilianzishwa mwaka 2016 kikiwa na jumla ya wanakikundi  5 na mtaji wa shilingi  4,000,000 ambayo ilitokana na wanakikundi wenyewe kuchanga.Kilianza rasmi kuzalisha bidhaa na kuziuza mnamo mwaka 2017.Bidhaa zinazozalishwa na kikundi hicho ni viatu vya ngozi aina zote , mikanda,mikoba,mifuko ,waleti na bidhaa nyinginezo nyingi za ngozi.Mpaka kufikia mahali walipo wameweza kuleta wataalamu mbalimbali kwa ajili ya mafunzo, ambapo hadi sasa wameshapata mafunzo mara 5,na jumla ya fedha kiasi cha shilingi 7,000,000, zimetumika katika kugharamia mafunzo hayo.Kwa sasa mtaji wao umefikia  shilingi   23,000,000.