WAKILI SHIJA AWASISITIZA WASIMAMIZI WA UCHAGUZI KUZINGATIA VIAPO VYAO

Posted on: October 26th, 2025

Kuelekea Uchaguzi Mkuu Oktoba 29, 2025 Msimamizi wa Uchaguzi Manispaa ya Temeke Wakili Fortunata Shija leo Oktoba 26, 2025 amefungua Mafunzo ya Wasimamizi wa Uchaguzi yaliyofanyika katika Ukumbi wa Chuo cha DUCE.

Wakili Shija amewaasa Wasimamizi  kuzingatia Viapo vyao wakati wa kutekeleza jukumu walilokabidhiwa na Serikali kupitia Tume huru ya Taifa ya Uchaguzi akisisitiza kuwa ni wajibu wa kila Msimamizi kuzingatia Sheria, Kanuni, Taratibu na Miongozo mbalimbali inayotolewa na Tume ili kuhakikisha Zoezi zima la Uchaguzi linafanyika kwa amani na kumwezesha Mwananchi kutumia haki yake ya kupiga kura bila Kadhia yoyote.

Wakili Msomi Shija ambaye ni Msimamizi wa Uchaguzi Jimbo la Temeke, Mbagala na Chamazi amefurahishwa na jinsi Wakufunzi wanavyoendesha Mafunzo hayo kwa kutoa ushirikiano stahiki kwa Washiriki wa Semina hiyo ambao ndiyo watakua Wasimamizi wa Mchakato mzima wa Upigaji Kura na hatimae kuzihesabu katika Vituo vya kupigia Kura.

Halkadhalika Wakili Shija ametoa wito kwa Wananchi kutumia haki yao Kikatiba na kujitokeza kwa wingi kupiga kura kuchagua Kiongozi wanaemtaka ambaye wanaamini kuwa ana uwezo wa kutatua Changamoto zinazokabili jamii yao na kuwaletea maendeleo endelevu kwenye familia zao na Taifa kwa ujumla.

Bado Siku 3 tu kufikia Oktoba 29, 2025

Kura yako Haki yako Jitokeze Kupiga Kura.