WALIMU TEMEKE WAMPONGEZA MKURUGENZI MABELYA

Posted on: June 2nd, 2023

Wanachama wa Chama cha Kulinda na kutetea haki za walimu manispaa  ya Temeke wamempongeza mkurugenzi wa manispaa ya Temeke ndugu Elihuruma Mabelya kuwatua mzigo, kufuatia utekelezaji wa ushauri wa Taasisi ya kuzuia na kupambana na rushwa (TAKUKURU) mkoa wa Temeke ambapo walishauri kusitishwa makato ya kuchangia vyama viwili vya walimu kinyume na matakwa yao.

Mkuu wa Takukuru Mkoa wa Temeke bwana Holle Makungu amesema uamuzi huo umefikiwa kufatia kuwepo na vyama viwili vya walimu ambavyo ni Chama cha Walimu Tanzania (CWT) na Chama cha Kuwalinda na Kutetea Haki za Walimu (CHAKUHAWATA).

Alisema awali Walimu waliwasilisha malalamiko yao TAKUKURU kuwa wamekuwa wakikatwa mishahara yao na kuchangia Vyama viwili kinyume na kifungu cha 61 (1) cha Sheria ya Ajira na Mahusiano Kazini namba 6 ya Mwaka 2004 ambayo inampa uhuru mfanyakazi kuchagua makato yake yaelekezwe kwenye Chama gani cha wafanyakazi anachoona kinamfaa.

Ndugu Holle Makungu alibainisha kuwa Kupitia kazi za uzuiaji Rushwa kwa maana ya dhana ya Takukuru rafiki na kwa kuzingatia kifungu cha 7 Sheria ya Kuzuia na Kupambana na Rushwa na 11/2007 tulimshauri Mkurugenzi kuhusu kadhia hiyo ambayo imekuwa ikiwapata Walimu hao na baada ya kupata ushauri huo alisitisha mara moja Makato hayo.