WANAFUNZI TEMEKE WALIOSHINDA OLIMPIKI MAALAMU KWENDA UJERUMANI NA RWANDA.

Posted on: February 9th, 2022

Mstahiki Meya wa Halmashauri ya Manispaa ya Temeke Mheshimiwa Abdallah Mtinika akiambatana na Mkurugenzi wa Manispaa hiyo Elihuruma Mabelya wameshiriki zoezi la utoaji zawadi na medali kwa wanafunzi 27 na walimu wao walioshiriki katika mashindano maalumu ya olimpiki yaliofanyika mkoani Mwanza Disemba 13 mpaka 17, 2021 ambapo Temeke ilitoa washindi watatu wataokwenda nchini Ujerumani na Rwanda Juni 2022.

Katika hafla hiyo Mhe. Mtinika amewapongeza washiriki na washidi kwa kuiwakilisha na kuitangaza Temeke na Tanzania katika ramani ya dunia huku akiwapa kongole walimu kwa kufanya kazi kubwa na nzuri iliyoiletea Manispaa hiyo heshima.

"Halmashauri ya manispaa ya Temeke inafanya vizuri  Kila eneo hususan katika mapato, ujenzi wa madarasa, mazingira na michezo, hali ambayo inatokana na juhudi na ushirikiano mzuri baina yetu katika kuhakikisha manispaa hii inazidi kuendelea". Alisema Mhe. Mtinika.

Kwa upande wake Mkurugenzi wa manispaa ya Temeke  Elihuruma  amesema ni vyema kuandaa bajeti juu ya watoto hao ambayo itasaidia kuwawezesha na kuwatengeneza vijana hao ili waweze kushiriki michezo hiyo kwa ufanisi.

"Ninawaahidi Mstahiki Meya, Afisa elimu wilaya na Afisa elimu maalum tutafanya kila liwezekanalo katika bajeti zetu ili  kusaidia vijana hawa kwani kuna mahitaji mengi ya fedha ili kuwawezesha vijana hao". alisema Mkurugenzi Mabelya

Naye Afisa Elimu Maalumu Manispaa ya Temeke Bi. Tatu Salum amesema anashukuru  kwa michango ya wadau kufanikisha vijana  hao kushinda mashindano hayo huku akisema kuwa maandalizi yanaenda vizuri kwa wanafunzi wataoenda Juni 2022 na wengine 2023 nchini Rwanda na Ujerumani.

Nao wanafunzi vinara wa mashindano hayo Subira Mwinyimkuu na Yusra wamesema wamefurahishwa na uongozi wa Manispaa kwa kuweza kuwathamini na kuwatia moyo kwa kuwapa zawadi na kuahidi kwamba wataenda kujiandaa vizuri ili kuiwakilisha vyema Temeke na Tanzania nje ya nchi.

Ikumbukwe mashindano hayo yalijumuisha michezo ya riadha, mpira wa miguu, mitupo pamoja na mpira wa nyavu ambapo Temeke ilitoa wachezaji hao kutoka shule za msingi na sekondari mbali mbali za kundi maalumu na kufanikisha ushindi huo.