WANANCHI WATAKIWA KUJIWEKEA UTARATIBU WA KUPIMA AFYA MARA KWA MARA

Posted on: February 27th, 2023

Na: Sweetbetter Njige

TMC Habari

Leo Februari 27,2023 idara ya Afya manispaa ya Temeke kwa kushirikia na Mkoa pamoja na wizara ya TAMISEMI (Tawala za Mikoa na Serikali za Mitaa) imefungua rasmi kampeni ya kliniki Tembezi katika viwanja vya Mbagala Zakhem.

Akizungumza katika ufunguzi huo muwakilishi wa mganga mkuu wa Mkoa Daktari Daisy Majamba alisema.

"Niwapongeze Wananchi kwa kufika kwa wingi kupata huduma mbalimbali za Afya, Serikali yetu chini ya Rais Samia Suluhu Hassan, inaendelea kutuhimiza Wananchi kuwa na utaratibu wa kupima afya mara kwa mara hususani kujua hali zetu kwa magonjwa yasiyo ambukiza" alisema Dkt. Daisy

Naye kaimu mganga mfawidhi wa manispaa ya Temeke daktari Boniface Mruma alisema Wananchi wanapaswa kutumia fursa hiyo ya huduma za vipimo na ushauri bure ili kujitengenezea mfumo mzuri wa maisha kiafya.

Kwa upande wao Wananchi waliopata huduma hiyo wameishukuru Serikali kwa kusogeza huduma bila malipo, na kuahidi kuitumia ipasavyo fursa hiyo.

"Naishukuru Serikali imetoa huduma muhimu kwa Wananchi kwa kushughulikia afya zetu mara kwa mara, izidi kuchunguza raia wake kwa ajili ya matibabu ya jumla. Leo nimehudumiwa macho na huduma nyinginezo bure ambapo ningeenda hospitali ingenigharimu ili kupata huduma hizo". Alieleza ndg. Silvester Mdoe.

Zoezi hilo la upimaji Afya bure katika viwanja vya Zakhem litafanyika kwa siku mbili,yaani tarehe 27/02/2023 na tarehe 28/02/2023 ili kutoa fursa kwa Wananchi wengi zaidi kupata vipimo na ushauri wa Kitabibu.