WANATEMEKE TUUNGANE, TUFANIKISHE JAMBO LETU KWA KISHINDO.

Posted on: May 10th, 2022

Na Sweetbetter Njige-TMC

Mwenge wa Uhuru ni moja kati ya alama muhimu za taifa la Tanzania,ambapo kwa mara ya kwanza uliwashwa katika kilelele cha mlima Kilimanjaro usiku wa Disemba 09,1961 kuashiria NURU,TUMAINI,HESHIMA na AMANI.

Serikali ya Tanzania ilianzisha mbio za mwenge wa Uhuru kwaajili ya kukusanya watu pamoja kushiriki katika shughuli za kisiasa,kijamii na kiuchumi, ambapo Mwenge huhusisha ukaguzi, uwekaji jiwe la msingi na ufunguzi wa miradi, unabeba jumbe za elimu na uhamasishaji , usikilizaji wa maoni na ushauri wa Wananchi waliofika katika miradi husika kwa ajili ya kuboresha mambo mbalimbali,unatoa ufafanuzi wa gharama zilizotumika kutekeleza miradi hiyo kwa namna nyepesi na kuhakikisha miradi inatekelezwa ipasavyo.

Kwa mwaka huu 2022, mbio za mwenge wa Uhuru zimezinduliwa mkoani  Njombe na mgeni rasmi, Makamu wa rais wa serikali ya awamu ya sita ,mheshimiwa  daktari Philip Isdor Mpango  Aprili 2, 2022.

Mkoani  Dar es Salaam, mwenge wa Uhuru umepokelewa  Mei 10, 2022 na katibu tawala  Ndugu Hassan Rugwa kwa niaba ya mkuu wa mkoa  Mhe. Amos Makalla ,katika viwanja vya shule ya msingi Bunju A, wilaya ya Kinondoni.

Temeke ikiongozwa na mkuu wa wilaya Mhe. Jokate Mwegelo itaupokea mwenge wa Uhuru siku ya Jumamosi  Mei 14, 2022 katika ofisi za TAZARA na kuanza kuumbiza  katika maeneo mbalimbali Wilayani hapa kwa ajili ya ukaguzi na ufunguzi wa miradi ikiwemo;

• Ujenzi wa vyumba 7 vya madarasa shule ya sekondari Karibuni.
• Wakala wa uuzaji wa Pikipiki-Taifa Kwanza.
• Ununuzi wa Greda la Manispaa.
• Ujenzi wa jengo la kujifungulia na upasuaji kinamama Zahanati ya Kilakala.
• Ujenzi wa vyumba 13 vya madarasa na matundu 16 ya vyoo shule ya Msingi Goroka A.

Miradi iliyogharimu jumla ya shilingi za Kitanzania 1,488,520,778.00 kati ya fedha hizo, serikali Kuu imechangia shilingi 398,700,000.00  halmashauri ya manispaa ya Temeke imechangia shilingi 1,084,851,078.00 na  Wananchi shilingi 4,969,700.00.

Kama ilivyo ada mchumia juani hulia kivulini, shughuli za kuzindua miradi, zitafuatiwa na  mkesha utakaopambwa na buruduani mbalimbali  katika viwanja vya Zakheim- Mbagala, ambapo Wananchi na Viongozi  wataungana kufurahia juhudi na matunda ya ushirikiano unaosababisha maendeleo endelevu  katika wilaya ya Temeke.

WanaTemeke  tuungane ,tufanikishe jambo letu kwa kishindo tukibeba  katika kumbukumbu zetu nia njema ya kuhesabiwa ifikapo  wakati wa sensa  ya watu na makazi itakayofanyika mwezi Agosti kama inavyojipambanua  katika kaulimbiu yake.

Ujumbe wa  mbio za mwenge wa Uhuru  2022;

“SENSA  NI  MSINGI   WA MIPANGO  YA MAENDELEO; SHIRIKI KUHESABIWA, TUYAFIKIE MALENGO YA TAIFA”. 

TEMEKE IMARA, KAZI IENDELEE.