Watumishi Maafisa toka Wizara ya Elimu na Mafunzo ya Amali Serikali ya Mapinduzi Zanzibar waitembelea Manispaa ya Temeke.

Posted on: June 10th, 2019

Watumishi Maafisa toka Wizara ya Elimu na Mafunzo ya Amali Serikali ya Mapinduzi Zanzibar waitembelea Manispaa ya Temeke na kujifunza mambo mbalimbali ya kiutendaji hususani ugatuaji wa madaraka,masuala ya Elimu sambamba na mbinu za ukusanyaji wa mapato unaofanywa na Manispaa ya Temeke.

Akipokea ugeni huo Mkuu wa Wilaya ya Temeke Mh.Felix Lyaniva alisema amefurahishwa kwa jinsi ambavyo wageni hao wameamua kutoka Unguja-Zanzibar na kuja Bara hususani katika Manispaa ya Temeke kujifunza namna ya uendeshaji wa Manispaa na mafanikio kwa ujumla.

“Nimefurahishwa sana na namna ambavyo mmetufikiria,sio rahisi kuacha Manispaa zote na kuja kwetu , hakika kuna kitu cha tofauti mmekiona na kuamua kuja kujifunza,tumefurahishwa sana na jambo hili”.Alisema Lyaniva.

Nae Mkurugenzi wa Manispaa ya Temeke ndugu Mwakabibi, alisema ninafurahishwa kwa jinsi ambavyo wageni mbalimbali wanavyoithamini Manispaa yetu na kuja kujifunza,urafiki huu wa kikazi utasaidia kujifunza mambo mbalimbali toka pande zote mbili kwa kubadilishana uzoefu.

“Sasa Temeke inazidi kuwa ya mfano, tumejionea wageni wengi toka Halmashauri mbalimbali nchini wakija kujifunza kwetu, na sasa imefikia mahali mpaka wageni toka visiwani wamepata habari njema za Manispaa na kuamua kuja kujifunza, hakika jambo hili linatia moyo sana katika utendaji wa kazi”.Alisema Mwakabibi.

Sambamba na hilo wageni walipata wasaa wa kuelekezwa namna Halmashauri yetu inavyofanikiwa katika suala zima la ugatuaji wa madaraka na mbinu za  ukusanyaji wa mapato .

Akitoa semina ya namna ya ugatuaji wa madaraka Mkuu wa Idara ya Utumishi na Utawala ndugu Mrisho Mlela alisema sera ya ugatuaji wa madaraka imesaidia kwa kiasi kikubwa kwani imeongeza uelewa  na ushiriki wa wananchi katika shughuli za maendeleo.

“Ni kweli kabisa ugatuaji wa madaraka umerahisisha uelewa wa wananchi wengi, karibu asilimia 90 ya kata zinaandaa na kuwasilisha mipango kwa kutumia mfumo wa fursa, pamoja na hayo serikali ina shule za sekondari za kata zipatazo 3,516 ambazo kwa sehemu kubwa zimejengwa kwa nguvu za wananchi hii inatupa faraja sana”.Alisema Mlela

Nae Afisa Elimu Msingi Bibi Dafroza Ndalichako alisema ugatuaji wa Elimu ya msingi na badaae Elimu ya sekondari ulitoka na tamko la Rais la tarehe 12/02/2008 kuhusu kugatua usimamizi na uendeshaji wa shule za Msingi na Serikali kutoka ilivyokuwa Wizara ya Elimu na mafunzo ya ufundi kwenda kwenye mamlaka za Serikali za Mitaa (MSM),kiutawala na idadi ya wanafunzi wanaofaulu  imekuwa ikiongezeka.
           Pamoja na hayo mhasibu wa mapato Bwana Harry Mbanga aliwaeleza wageni hao kuwa Halmashauri imebuni vyanzo mbalimbali vya mapato ambavyo vimeifanya Manispaa kuendelea kujisimamia yenyewe katika masuala mengi ya uendeshaji wa Halmashauri , pamoja na hayo alibainisha kuwa Serikali imeweza kuboresha huduma za afya  kwa mwaka 2007 ambapo idadi ya vituo  ilikuwa 308 na kata zilikuwa 2500 lakini 2018/19 idadi  ni 4,420 ambapo vituo vya afya vimeongezeka hadi kufikia 535, pia  imejikita katika ujenzi na ukarabati wa miundo mbinu ya vituo vya afya nchini na kuajiri wataalam wa afya, uboreshaji wa takwimu kwa kutumia mfumo kieletroniki (GOTHOMIS) pamoja kudhibiti makusanyo ya mapato katika vituo vya huduma pamoja na kuhimiza malipo ya kadi.

Nae Mkurugenzi wa Idara ya  Elimu ya Maandalizi na Msingi Zanzibar Bibi Safia A. Rijaal alimshukuru Mkurugenzi na watendaji kwa ujumla kwa  namna walivyopokelewa na masomo waliyoyapata yatakuwa chachu ya mabadiliko katika kuhakikisha wanasonga mbele.