WAZIRI MKUU MAJALIWA AKAGUA MRADI WA BRT-2 TEMEKE

Posted on: August 13th, 2025

Waziri Mkuu wa Jamhuri ya Muungano wa Tanzania Mhe. Kassim Majaliwa leo Agosti 13, 2025 amefanya ziara ya kukagua Mradi wa Mabasi yaendayo kasi Awamu ya pili (BRT -2) na Miundombinu yake katika Vituo Vikuu vya Mabasi hayo ikiwemo Kituo cha Mbagala Rangi tatu.

Waziri Majaliwa ametembelea Ujenzi wa Kituo maalum cha kujazia gesi kwa ajili ya Mabasi hayo kinachojengwa katika Kituo cha Mbagala Rangitatu ambapo Nishati hiyo ya gesi itatumika katika uendeshaji wa mabasi hayo takribani 257.

Awali ya Ziara hiyo ilianzia katika Bandari ya Dar es Salaam ambapo Waziri Majaliwa ameona Shehena ya kwanza ya Mabasi 99 yaliyokwisha ingia Nchini.

Waziri Majaliwa akiwa Mbagala amesisitiza Mawasiliano ya karibu kati ya DART, Waendeshaji wa Mradi huo, OR-TAMISEMI pamoja  na Watoa huduma za kifedha upitia Kadi za Kielektroniki kufanya kazi usiku na mchana ili tu mara baada ya mabasi yote 257 kuwasili ndani ya mwezi huu Mradi uanze kutoa huduma iliyo ya kisasa, salama na haraka kwa Wananchi.

Halkadhalika Waziri Majaliwa amemtaka Mkurugenzi wa Chuo cha Usafirishaji cha Taifa (NIT) kuandaa Mchakato madhubuti utakaowezesha Madereva kuyaendesha Mabasi hayo kiufasaha kwa usalama wa Abiria na Chombo chenyewe.

Ziara hiyo imehudhuriwa na Mhe. William Lukuvi, Waziri wa Nchi Ofisi ya Waziri Mkuu (Sera, Bunge na Uratibu), Mhe. Zainab Katimba, Naibu Waziri OR-TAMISEMI, Katibu Mkuu kutoka OWM (Sera, Bunge na Uratibu) Dkt. Jim Yonaz, Mkuu wa Wilaya ya Temeke Mhe. Sixtus Mapunda ambaye pia amemwakilisha Mkuu wa Mkoa wa Dar es Salaam, pamoja na Watendaji kutoka LATRA, NIT,  na DART.