Waziri Mpina Kushughulikia Bei ya Ngozi

Posted on: August 3rd, 2019

Waziri wa Mifugo na uvuvi Mhe. Luhaga  Mpina ameahidi kushughulikia bei ya ngozi ili iweze kuwanufaisha wafugaji  pamoja na na wazalishaji wa bidhaa za ngozi.Mhe. Mpina ameyasema hayo leo alipotembelea banda la halmashauri  ya Manispaa ya  Temeke katika viwanja vya maonyesho ya Nanenane  Morogoro. 

Akizungumza wakati akiangalia viatu vinavyotengenezwa  na wajasiriamali kutoka katika kiwanda kidogo kijulikanacho kwa jina la SIMONS kilichopo Kata ya Toangoma,Manispaa ya Temeke, Mh.  Mpina amesema''Msindikaji ananunua ngozi kwa mfugaji kwa sh. 1000  mpaka 3000,ngozi hiyo hiyo ikishasindikwa  inauzwa kati ya sh.   36,975 hadi sh.  127,500. Lazima tulishughulikie, kwa sababu kwa hali ilivyo sasa wazalishaji wa bidhaa za ngozi wananunua ngozi kwa wasindikaji kwa bei kubwa sana kitu kinachosababisha bidhaa za ngozi zinzozalishwa kwa kutumia ngozi ya hapa nchini kushindwa kushindana na bidhaa zinazoingizwa kutoka nje ya nchi ambazo bei zake zinakuwa chini kutokana na gharama zake za uzalishaji kuwa ndogo ". 

Mhe.Mpina amesema kwamba nilazima ifike mahali ngozi inayozalishwa hapa nchini iwanufaishe wadai wote wa ngozi kwani kwa jinsi ilivyo sasa ngozi haimnufaishi mfugaji kabisa. 

Akiwa katika banda la manispaa ya Temeke  Mhe.  Mpina ametembelea eneo la mifugo ambapo amejionea mifugo kama ng'ombe, kuku, bata, sungura, kuku na mbwa inayofungwa kwa kufuata kanuni za ufugaji bora. Vilevile ametembelea bwawa la samaki na bwawa la kuoteshea majani ya mifugo (Azolla) 

Kadhalika Mhe. Mpina ametembelea wajasiliamali wa Temeke  ambapo amejionea bidhaa za aina mbalimbali kama bidhaa  zitokanazo na mazao ya kilimo kama matunda yaliyosindikwa, mboga za majani zilizokaushwa, viungo vya chakula,uyoga,maharage,mchele,karanga na mafuta ya alizeti.  Bidhaa zitokanazo na kazi za mikono kama mikoba na waleti za kina mama, vikapu, hereni, bangili, mikufu, shanga na nguo. 

Aidha Mhe. Mpina ametoa pongezi nyingi kwa watu wote waliohusika kuandaa maonyesho ya Nanenane kanda ya Mashariki ambapo amesema kwamba kila mwaka kuna kuwa na mabadiliko, jambo ambalo linaonyesha wazi kuwa kuna kazi kubwa inafanyika kuyafanya maonyesho yawe bora zaidi. Mhe. Mpina pia amezipongeza halmashauri ambapo amesema kwamba halmashauri zote alizotembelea ziko vizuri sana, mabanda yamepambwa vizuri, yamependeza ,mifugo na mazao yako vizuri sana,  bidhaa zinazoonyesha pia ziko vizuri.

Mhe. Mpina amefanya ziara katika maonyesho  ya Nanenane kanda ya mashariki ambayo yanafanyika ndani ya manispaa ya Morogoro. Katika ziara hiyo Mhe. Mpina ametembelea mabanda mbalimbali likiwemo banda la halmashauri ya manispaa ya Temeke.