ZAIDI YA HATI MILIKI 170 ZAKABIDHIWA KWA WANANCHI TEMEKE

Posted on: September 22nd, 2023

Na: Joanita Joseph -TMC

Ikiwa ni muendelezo wa programu ya Ardhi Clinic (Hati papo hapo) chini ya mradi wa uboreshaji usalama wa Milki za ardhi Nchini unaofadhiliwa na Benki ya dunia na kutekelezwa na Wizara ya Ardhi, Nyumba Maendeleo ya Makazi, zaidi ya wananchi 170 wamefanikiwa kupata hati miliki zilishoghughulikiwa chini ya programu hiyo mara baada ya kuzinduliwa Septemba 20, 2023 Mbagala wilayani Temeke.

Akizungumza kwenye mahojiano mafupi mwakilishi wa Mradi huo Bi.Aisha Masanja

amesema kuwa vigezo vya kupata hati ni rahisi na mpaka sasa miamala zaidi ya 200 imepokelewa, kati ya hiyo imeshalipiwa na zaidi ya wananchi 170 wamekabidhiwa hati zao.

"Mwananchi anatakiwa kuwa na vielelezo vyake vya umiliki wa kiasili kama mikataba ya mauziano, kitambulisho ama namba ya NIDA na barua ya utambulisho kutoka serikali za mtaa, akija na hivyo vitu anaweza kuanzisha muamala wake, kufanya malipo na kupata hati" alisema Bi Aisha

Aidha amebainisha kuwa mradi una kipengele cha kupima kwa awamu ya pili hivyo kwa wananchi ambao bado maeneo yao hayajapimwa watafikiwa kwa awamu ya pili ikiwemo utoaji wa leseni za makazi.

Bi Aisha ametoa wito kwa wananchi kuendelea kujitokeza na kutumia fursa hii muhimu kwa ajili ya kuboreshewa milki za ardhi zao.

"Sisi ni Ardhi clinic, 'Matibabu site' ukifika hapa changamoto za urasimishaji tunatatua, tunakupa elimu ya masuala ya ardhi, pia tunatoa hati ndani ya muda mfupi sana lakini pia tumetatua migogoro takribani 30 na kutoa elimu hivyo tunahitaji mwamko mkubwa kwa wananchi" alisema Bi. Aisha.

Serikali ya Jamhuri ya Muungano wa Tanzania kupitia Wizara ya Ardhi, Nyumba na Maendeleo ya Makazi imejipanga kuboresha usalama wa Milki za ardhi kwa nchi zima ambapo kwa mtaa wa Mbagala mashariki zoezi hili la "Ardhi Clinic" litafikia tamati Jumamosi Septemba 23,2023.