ZAIDI YA WATOTO 1000 TEMEKE WAFANYIWA UCHUNGUZI WA MACHO

Posted on: November 20th, 2020

Wilaya ya Temeke imeadhimisha siku ya mtoto Duniani kwa kuwafanyia uchunguzi wa macho Watoto Zaidi ya 1000, maadhimisho ambayo yamefanyika katika shule ya msingi Majimatitu Kata ya Mianzini Wilaya ya Temeke Jijini Dar es Salaam.

Maadhimisho hayo yenye kauli mbiu “ kuwekeza kwa Watoto wetu ni kuwekeza kwa Maisha yetu ya baadaye” yamefanyika yakipambwa na maswali ya papo kwa hapo  yaliyoulizwa kwa Watoto ili kuwapima ufahamu na kurushwa moja kwa moja Clouds Radio.

Akiongea wakati wa maadhimisho hayo  Mkuu wa wilaya ya Temeke Mhe Godwin Gondwe ametoa wito kwa wazazi na walezi kuhakikisha wanapima afya za watoto wao mara kwa mara angalau mara moja kwa mwaka kwa watoto wakubwa na kwa mama mjamzito ahudhurie kliniki si chini ya mara nne toka anapopata ujauzito ili apate maelekezo na ushauri wa makuzi bora ya mtoto.

Mkuu wa Wilaya ya Temeke akiwa pamoja na wanafunzi wa shule ya msingi Majimatitu walioovaa mavazi ya kuzuia mvua waliyopatiwa na wadau wakati wa zoezi la upimaji wa macho.

Sambamba na hilo amewataka wazazi kuzingatia lishe bora kwa watoto kwa kufuata ushauri unaotolewa na wataalamu wa lishe ili waweze kukua kimwili na kiakili vilevile amesema Serikali pamoja na wadau itashirikiana kugharamia matibabu ya watoto wote waliobainika na matatizo wakati wa uchunguzi huo.

Aidha kaimu Mganga Mkuu wa Manispaa Dkt Projest Mtasingwa amebainisha kuwa zoezi la upimaji limeenda vizuri na  matokeo ya uchunguzi wa macho uliofanyika kwa watoto katika shule ya msingi Majimatitu ni watoto 127 wamegundulika kuwa na maambukizi ya macho na tayari wameshapatiwa dawa, watoto 90 wamegundulika kuwa na aleji ya macho, mtoto mmoja amebainika kuwa na mtoto wa jicho pia watoto wapatao 7 wamebainika kuwa na matatizo ambayo yanahitaji matibabu ya kibingwa.

Mwisho Mkuu wa Wilaya amewashukuru wazazi na walezi kwa kuwaleta watoto wao kupimwa macho na pia wadau mbalimbali wakiwemo vyombo vya habari.