Ijue TARURA jinsi inavyofanya kazi katika Manispaa ya Temeke

Posted on: March 3rd, 2019

“Wakala wa Barabara za Mijini na Vijijini (TARURA) umeanzishwa chini ya Sheria ya Wakala wa Uanzishwaji wa Wakala za Serikali, Cap.125 na ulizinduliwa rasmi mwezi Julai, mwaka 2017 na Waziri Mkuu wa Jamhuri ya Muungano wa Tanzania, Mheshimiwa Kassim Majaliwa.

Moja ya jukumu la Wakala huu ni kusimamia miundombinu ya barabara, jukumu ambalo mwanzoni lilikuwa likisimamiwa na Halmashauri zetu au Mamlaka za Serikali za Mitaa. Hivyo jukumu hilo limetolewa rasmi katika Mamlaka za Serikali za Mitaa na kukabidhiwa rasmi kwa TARURA. Majukumu ya kimsingi ni pamoja na matengenezo na ujenzi wa barabara mpya pale zinapohitajika.

Majukumu mengine ya TARURA ni kukusanya mapato yatokanayo na matumizi ya hifadhi za barabara katika barabara zetu zilizokuwa chini ya Serikali za Mitaa na jukumu hilo hufanyika katika kila ngazi ya wilaya,” Mhandisi Nicholaus anaeleza.

Miradi ya Barabara

Mhandisi anafafanua, “Tangu kuanzishwa kwa Wakala huu umefanikisha kutekeleza miradi mbalimbali ya barabara:-

Kwa mwaka wa fedha 2017/2018 tulitekeleza miradi ya barabara iliyokuwa na thamani ya Shilingi Bilioni 8.8 za Kitanzania ambapo ulihusisha matengenezo ya aina mbalimbali (periodic maintenance), matengenezo ya mara kwa mara (routine maintenance) na matengenezo ya maeneo korofi (spot improvement) sambamba na hilo TARURA imefanikiwa kutengeneza madaraja na makalavati makubwa.

Kwa mwaka wa fedha 2018/2019 tumeendelea na metengenezo ya barabara. Tulikuwa na bajeti ya Shilingi Bilioni 3.49 za Kitanzania ambazo zimetumika katika matengenezo ya barabara na tumekadiria kutengeneza kwa mwaka huu wa fedha zaidi ya Kilomita 80.2 ambazo zinapatiwa matengenezo ya aina mbalimbali yaani barabara zitakazokuwa kwa kiwango cha lami mfano: barabara ya Mbozi, Chihota, Masaki-Toangoma.

Pia tumekabidhiwa jukumu lingine la kusimamia baadhi ya miradi inayofadhiliwa na Benki Kuu ya Tanzania (BOT). Miradi hiyo ni pamoja na ya DMDP ambapo tumekabidhiwa utekelezaji wa miradi hiyo isiyopungua kilomita 96 ambazo zinatarajiwa kutengenezwa ndani ya kipindi hiki. Miradi hii imegawanywa katika awamu, kuna awamu ya kwanza ambayo inaishia mwaka 2020 ambapo kutakuwa na utengenezaji wa barabara za kilomita 96 za kiwango cha lami na mifereji yake zikitekelezwa ndani ya kata 6 zilizopo katika Manispaa ya Temeke.Mwajiri wa Miradi hiyo atabaki kuwa Mkurugenzi wa Manispaa na TARURA inaendelea kuwa msimamizi pekee, hivyo tutaendelea kutekeleza miradi mingine inayofadhiliwa na Mfuko wa Barabara.”

Mhandisi anaendelea, “Kimsingi TARURA tangu ilivyoanza mpaka leo ipo katika kipindi cha mpito kwa hivyo kuna miradi mingi ambayo tumekuwa tukiitekeleza kwa ushirikiano wa karibu na Manispaa husika. Kwa mfano; Manispaa ya Temeke imekuwa na miradi mingi ya barabara ambapo inahamisha fedha kutoka vyanzo vya ndani kwa barabara zao ambazo wanadhani zina uhitaji wa kuboreshwa na kuzihamishia katika Mfuko wa TARURA kwa ajili ya utekelezaji wa miradi ya barabara waliyoipendekeza. Kwa sasa TARURA imekwishapokea takriban Shilingi Milioni 200 za Kitanzania ndani kwa bajeti ya mwaka huu kwa minajili ya utekelezaji wa barabara ya Mchumila itayotengenezwa kwa kiwango cha .Changarawe

Pia, Manispaa ya Temeke ina jukumu la kuchangia ujenzi wa barabara ya Mbozi na tuna matarajio ya kupokea takriban Shilingi Bilioni 1.3 za Kitanzania kukamilisha mradi huo. Sehemu ya mradi huo unapata fedha kutoka Mfuko wa Barabara na fedha zingine zinatoka kwenye vyanzo vya ndani vya Mkurugenzi. Miradi ya namna hii iko miwili, Mradi wa Mbozi na Kiburugwa. Kwa Mradi wa Kiburugwa wenyewe unagharimu Shilingi Bilioni 1.8 za Kitanzania zinazotakiwa kutoka kwenye Ofisi ya Mkurugenzi kwa ajili ya kukamilisha mradi huo.

Kwa Manispaa ya Temeke, Mtandao wetu wa barabara una kilomita 575.75 na hizo ni zile zilizotambuliwa na Mfumo wa sijaelewa kama lipo sahihi na kwa sasa bado zipo zingine ambazo tunaendelea kuziboresha. Kati ya hizo kuna kilomita takriban 59 za lami na kilomita 139 za kiwango cha changarawe na kilomita 376 za udongo ambazo tunaziboresha kuzipeleka katika changarawe na zile zilizo katika changarawe tunazipeleka katika kiwango cha lami.”