MHE.UMMY MWALIMU ATANGAZA NEEMA TEMEKE

Posted on: August 9th, 2023

Na: Joanita Joseph

Waziri wa afya nchini Mhe Ummy Mwalimu amefanya ziara katika manispaa ya Temeke lengo likiwa ni kupokea taarifa ya utoaji wa huduma za afya pamoja na kukagua miradi ya ujenzi.

Ziara hiyo imefanyika leo Agosti 9,2023 ambapo Mhe.Ummy alipokea taarifa ya halmashauri ya manispaa ya temeke hususani katika sekta ya afya pamoja na kutembelea hospitali ya Mbagala Rangi tatu, iliyopo kata ya Mbagala wilayani Temeke ambapo alikagua mradi wa ujenzi wa jengo la ghorofa 6.

Aidha Waziri huyo wa Afya alipata fursa ya kusikiliza changamoto mbalimbali katika utoaji huduma ikiwemo ukosefu wa chumba cha kuhifadhia maiti pamoja na changamoto nyingine.

Waziri Ummy Mwalimu pia amemtaka mkandarasi kukamilisha jengo hilo kwa wakati ili huduma ziweze kutolewa na kuahidi Serikali itaongeza shilingi Bilioni 2 kwa ajili ya kuharakisha ujenzi huo.

Mhe Ummy aliongeza kuwa katika kuendelea kuimarisha huduma za afya Serikali itajenga hospitali nyingine ya wilaya ya Temeke pamoja na kupandisha hadhi zahanati 2 kwa kila jimbo kuwa na vituo vya afya.

" Mhe Rais Samia Suluhu Hassan hajatosheka na kuwa na hospitali hii ya Mbagala hivyo amenielekeza niwaelekeze hospitali ya Taifa Muhimbili kutoa ekari 30 pale Vikuruti, Chamazi na kuipatia manispaa ya Temeke kwa ajili ya kujenga hospitali ya wilaya".Alisema Mhe.Ummy

Sekta ya Afya katika manispaa ya Temeke imekuwa ikiboreshwa kwa kasi kubwa katika kipindi hiki cha Serikali ya awamu ya sita chini ya Mhe.Rais Dkt.Samia Suluhu Hassan.