Mkuu wa Wilaya ya Temeke akiweka bayana mambo ya kuzingatia katika utambuzi wa ugawaji wa vitambulisho vya wajasiriamali

Posted on: February 26th, 2019

 Mkuu wa Wilaya ya Temeke Mh Felix Lyaniva  amefanya ukaguzi  na ugawaji wa vitambulisho kwa wajasiriamali  wadogowadogo katika soko la Kampochea na Mbagala Rangi Tatu Jijini Dar es salaam.

Kabla ya ugawaji wa vitambulisho hivyo Mh Lyaniva aliwaelimisha wajasiriamali hao umuhimu wa kuwa na kitambulisho hicho cha utambuzi ambacho ni silaha kwa mfanya biashara ndogondogo,  na kuwataka wavivae vionekane na si kuviweka mfukoni.

“Ninawataka wajasiriamali muelewe umuhimu wa kuwa na kitambulisho hichi sambamba na uvaaji wake na si kukiweka katika pochi ama kukiacha nyumbani,mvae vionekane ili tuwatambue popote mtakapokuwa mnafanya shughuli zenu za kutafuta riziki”alisema .

Mh. Lyaniva alilazimika kufanya ukaguzi huo ili kuhamasisha wajasiriamali kuchukua  vitambulisho hivyo ili kuondokana na usumbufu wa kutokutambulika na kuondokana na adha na kero za kutokutambulika kisheria.

“Mkumbuke kuwa zoezi hili ni endelevu na tutapita kila wakati kuona kama wajasiriamali wote wanatambulika kisheria ili tuanze msako wa kuwabaini wasio navyo”alisisitiza.

Ikumbukwe kuwa vitambulisho hivyo ni maalumu kwa baadhi ya makundi ya wajasiriamali kama vile Mama lishe, Wakaanga chipsi, Waosha magari, Wauza CD, Wachinja kuku, Washona nguo, Wapaka rangi za kucha, Wakatisha tiketi za mabasi,Mafundi seremala, pamoja na wengine wa makundi ya muundo huo.

Katika Wilaya ya Temeke ilipatiwa jumla ya vitambulisho elfu ishirini na saba (27,000) na mpaka sasa vimeshagaiwa vyote kwa wahusika na wafanyabiashara wananendelea na biashara zao kama kawaida.

vilizinduliwa na Mh.Rais wa Jamuhuri ya Muungano wa Tanzania Dr.John Pombe Magufuli  mnamo 2018 mwezi Desemba ,ikiwa na lengo la kuwasaidia wajasiriamali hao wa biashara ndogondogo na kufanya watambulike kisheria.