BARAZA LA MADIWANI LAPITISHA "MASTERPLAN" KWA KISHINDO

Posted on: January 30th, 2023

Na: Nassoro Rashid

TMC Habari

Januari 30, 2023 Naibu Meya wa Halmashauri ya Manispaa ya Temeke Mhe. Anord Peter ameongoza baraza maalumu la kuwapatia madiwani pamoja na watumishi uelewa juu ya mpango kabambe wa jiji la Dar es salaam unaoratibiwa na Wizara ya Ardhi, Nyumba na Maendeleo ya Makazi kuanzia mwaka 2016 - 2036.

Akizungumza mara baada ya kikao hicho Mhe. Anord amesema Madiwani pamoja na Watumishi walipata fursa hiyo ikiwa ni maelekezo ya Waziri wa Ardhi katika upatiwaji wa uelewa juu ya mkakati wa serikali wa namna ya kulipanga jiji la Dar es Salaam.

"Tumeona mpango wa jiji hili umegusa katika maeneo mbalimbali ikiwemo barabara, maji safi na uhifadhi maji taka, umeme, masoko, mifereji lengo ikiwa kuondoa adha na kumlenga Mwananchi moja kwa moja kwa kutatua changamoto mbalimbali zinazomkabili" Alisema Mhe. Anord.

Kadhalika Mhe. Anord amesema mpango huo unakuja kutekelezwa pia katika ngazi ya Halmashauri ikiwa ni mkakati endelevu wa kumkomboa Mwananchi wa kawaida hivyo wao kama Viongozi wameupokea kwa mikono miwili.

Naye Kaimu Mkuu wa Idara ya Ardhi Manispaa ya Temeke Ndugu Salumu Urembo amesema kikao hichi ni utekelezaji wa maazimio ya kikao cha Januari 06,2023 cha Waziri wa Ardhi kwa kuwa mpango unatekelezwa Dar es Salaam,aliona ni vema Viongozi wake wapate uelewa ili kuwapatia elimu Wananchi ,wakati utapotekelezwa iwe rahisi kupokelewa.

Mpango huo wa miaka 20 unatarajiwa kuwa chachu ya mabadiliko na utatuzi wa changamoto mbalimbali zinazoendelea kuwakabili Wananchi ikiwemo utatuzi wa msongamo wa watu na vyombo vya usafiri katikati ya jiji, umeme, maji safi na uhifadhi wa maji taka, viwanda na biashara, mfumo wa kitaasisi na upatikanaji wa huduma za Serikali kwa Wananchi kwa urahisi.