TEMEKE KUANDAA MPANGO MKAKATI WA MIAKA MITANO.

Posted on: January 27th, 2026

Ni Warsha Maalum ya kupanga Mikakati iliyofunguliwa rasmi leo Januari 26, 2026 katika Ukumbi wa Iddy Nyundo Manispaa ya Temeke ikibeba lengo kuu la kujadili na kuandaa Mpango Mkakati wa Halmashauri wa Miaka mitano yaani kuanzia 2026 hadi 2031.

Akizungumza wakati wa Kikao hicho kwa niaba ya Mkurugenzi wa Manispaa ya Temeke,  Ndg. Cassim Mfaume amewahimiza Washiriki wa Kikao hicho ambao ni Wakuu wa Idara, Sehemu na Vitengo kuwa makini kuhakikisha wanapanga Mipango  bora na muhimu  inayoweza  kutekelezeka kwa wakati.

" Natambua jukumu lililopo ni muhimu sana kwa mustakabali wa Manispaa yetu kwa Miaka Mitano ijayo, hivyo ni muhimu kuzingatia Weledi na muda wenu ili kukamilisha jukumu hilo kwa wakati", alisema Ndg. Mfaume.

Kwa Upande wake Mwezeshaji wa Kikao hicho Profesa Baltazary Namwata  amewataka Washiriki wote kushirikiana ipasavyo  kwani wao ndiyo wenye taarifa muhimu za Idara na Vitengo huku akiongeza kuwa taarifa hizo ndiyo msingi mkubwa wa Mpango Mkakati wa Miaka Mitano ijayo.

Halkadhalika, Profesa Namwata amewaasa Washiriki hao kuupitia Mpango Mkakati unaoishia Mwaka huu (Strategic planning 2026), Dira ya Taifa 2050, Hotuba ya Rais ya Uzinduzi wa Bunge la 13, Muongozo wa Taifa wa Kupanga 2025 (National Planning guideline 2025) na Nyaraka nyinginezo ambazo ni muhimu zinazowezesha kupata Msingi wa jinsi gani watakwenda kutekeleza Mpango Mkakati wa Miaka Mitano ijayo.

Warsha hii inatarajiwa kufanyika kwa muda wa Siku 5 yaani Januari 26-30, 2026 ambapo kuanzia kesho Januari 27, 2026 itafanyika katika Ukumbi wa Maabara  Kuu ya Mifugo ya Taifa Sokota Veterinary.