"ELIMU YA UCHANGIAJI DAMU IWE AJENDA YA KILA SIKU." DC Gondwe.

Posted on: November 21st, 2020

Mkuu wa wilaya ya Temeke Mhe. Godwin Gondwe amewaagiza watendaji wa serikali wilayani humo kuendelea kutoa elimu ya uchangiaji damu.

Mhe.Gondwe ametoa agizo hilo mapema leo wakati wa hotuba yake kwa wana jumuiya ya Kiislam ya Jamii Yatul  Akhlaaqul Islaam (J.A.I)  na wananchi mbalimbali waliojitokeza kwa wingi mapema asubuhi katika hospitali ya Mbagala Rangi Tatu kuchangia damu kwa ajili ya kuwasaidia watu wenye uhitaji.

Akisisitiza kuhusu umuhimu wa kuchangia damu Mhe Gondwe amesema" Damu haina mbadala,huwezi kusema kwamba kwa sababu damu haipo tutafute jambo lingine tuweze kumwekea binadamu.Damu anayowekewa binadamu,inatoka kwa binadamu"

Mkuu wa wilaya ya Temeke Mhe Godwin Gondwe akitoa hotuba katika hospitali ya mbagala rangi tatu wakati wa zoezi la uchangiajia damu.

Mhe Gondwe amesema kwamba mwaka 2019 upungufu damu katika hospitali ya Mbagala rangi Tatu ulikuwa kwa 49% ,lakini kuanzia Januari 2020 hadi mwezi huu,upungufu ni 18%, hali inayoonyesha kwamba elimu ya uchangiaji damu imetolewa,na wananchi wameelewa.Hata hivyo Mhe.Gondwe amesisitiza kuendelea kutolewa kwa elimu hiyo ambapo amesema" Wakuu wa Idara,Maafisa Tarafa,Watendaji wote,tukitoka kwenda kwenye kazi zetu za kila siku,elimu ya uchangiaji damu iwe  ni moja ya ajenda endelevu kuanzia sasa ndani ya wilaya ya Temeke"

Aidha Mhe Gondwe amewashukuru wanajumuia ya J.A.I kwa kuuona uhitaji,na kuamua kuchangia damu,amesema  kwamba wamefanya kazi nzuri na ya kutukuka,na amezitaka jumuiya zote wilayani Temeke kuiga mfano kwa jumuiya hiyo ambayo imeonyesha kujali na kuthamini maisha ya watu. Katika hatua nyingine Mhe. Gondwe amewapongeza Wanatemeke kwa   kuelewa,na kuona umuhimu wa kuchangia damu,jambo ambalo limewezesha kupungua kwa changamoto ya upungufu wa kiasi cha damu kinachohitajika.

Taasisi ya J.A.I imeendesha zoezi la uchangiaji damu katika hospitali ya  Mbagala Rangi Tatu,hii ikiwa ni mara ya kwanza kwa taasisi hiyo kutekeleza zoezi hilo katika mkoa wa Dar es Salaam.Ambapo imeweka historia ya kipekee kwa kuanzia katika wilaya ya Temeke.