IDARA YA MAENDELEO YA JAMII MANISPAA YA TEMEKE YAGUSWA KUSAIDIA WATOTO WENYE UHITAJI

Posted on: January 18th, 2024

Na: Joanita Joseph -TMC Habari

Watumishi kutoka Idara ya maendeleo ya jamii halmashauri ya manispaa ya Temeke katika kutekeleza majukumu yao leo Januari 18, 2024 wamefanya matendo ya huruma kwa jamii kwa kutembelea kituo cha watoto yatima wenye ulemavu kiitwacho Human Dreams Children's village kilichopo Mikwambe kata ya Tuangoma wilayani humu.

Watumishi hao kupitia idara hiyo wamekabidhi bima za afya 35 zenye thamani ya shilingi elfu arobaini kwa kila moja, unga wa lishe, siagi, maziwa pamoja na kiasi cha fedha kutoka katika sehemu ya mishahara yao ikiwa ni sehemu ya kuchangia mahitaji ya kila siku kwa watoto hao.

Akizungumza katika ziara hiyo Bi. Furaha Chiwile, Mkuu wa idara ya maendeleo ya jamii Manispaa ya Temeke ametoa wito kwa wadau wa maendeleo kusaidia watoto wenye uhitaji lakini pia kwa wazazi kutunza watoto kama hao endapo watapatikana kwenye familia yao.

"Jamii tunapopata changamoto ya watoto tusiwatupe, tuangalie namna gani ya kuwalea badala ya kuwatelekeza, tuzingatie maelekezo tunayopewa na wataalam wa afya katika kutunza ujauzito ili mtoto asipate matatizo pindi atakapozaliwa. Lakini pia nitoe wito kwa wadau kutembelea vituo vya watoto wenye mahitaji maalum kama hivi" Alisema Bi Furaha.

Nae Emmanuel Hillary, msimamizi wa kituo hicho ametoa shukrani kwa idara hiyo na halmashauri kwa ujumla kwa kuwawezesha msaada huo huku akiiomba Serikali kuendelea kusaidia vituo kama hivyo ukizingatia utunzaji wa watoto hao unahusisha gharama kubwa.

Kituo hicho kilichoanzishwa mwaka 2015 na mama Nicole mtawa mwenye asili ya kijerumani mpaka sasa kinahudumia jumla ya watoto 48 ambapo 33 wanaishi na kutunzwa kituoni hapo na 15 wanakuja kwenye huduma ya mchana (day care).