KUELEKEA UCHAGUZI KATA YA MBAGALA KUU, WASIMAMIZI WA UCHAGUZI WANOLEWA.

Posted on: December 27th, 2025

Na: Abdulhamidu Shaban, TMC Habari

Msimamizi wa Uchaguzi Jimbo la Mbagala Wakili Fortunata Shija amewataka Wasimamizi na Wasimamizi Wasaidizi wa Vituo vya kupigia Kura kuzingatia Sheria, Kanuni na Miongozo ya Uchaguzi pamoja na kufuata Maelekezo kutoka Tume Huru ya Taifa ya Uchaguzi ili kuongeza ufanisi katika Zoezi la Upigaji Kura.

Wakili Shija ameyasema hayo leo Desemba 27, 2025 wakati akifungua Mafunzo ya wasimamizi na Wasimamizi Wasaidizi wa Vituo vya kupigia Kura yaliyofanyika katika Ukumbi wa Hela Sita Kata ya Kijichi ikiwa ni Maandalizi kuelekea Siku ya Uchaguzi wa Marudio Nafasi ya Udiwani utakaofanyika Jumanne ya Desemba 30, 2025.

" Msiache kusoma mara kwa mara katiba, sheria, kanuni, taratibu na kuzingatia maelekezo yote yanayotolewa na Tume na ullizeni ili mpate kutatua changamoto katika maeneo yenu". Alisema Wakili Shija

Aidha Mratibu wa Uchauzi Mkoa wa Dar es Salaam Ndg. Gerald Peter Sondo amewasihi washiriki wa mafunzo hayo kulibeba jambo la Uchaguzi huo kwa umakini katika utekelezaji wake kwani hilo ni suala la kitaifa.

"Kura Yako Haki yako Jitokeze Kupiga Kura"