LEAT KUTOA ELIMU YA MAZINGIRA KIBURUGWA

Posted on: August 13th, 2021

Kamati ya mazingira wilaya ya Temeke pamoja na Maafisa kutoka LEAT wakiwa katika ziara kutembelea maeneo yenye  changamoto za kimazingira.

Kamati ya mazingira wilaya ya Temeke pamoja na Maafisa kutoka LEAT wakiwa katika majumuisho,mara baada ya ziara.

Kamati ya mazingira wilaya ya Temeke kwa kushirkiana na Maafisa kutoka katika asasi isiyokuwa ya Kiserikali ya Wanasheria Watetezi wa Mazingira ( LEAT), leo  Agost 13,2021 wamefanya ziara katika kata ya Kiburugwa iliyopo manispaa ya Temeke.

Lengo la ziara hiyo ni kuangalia changamoto mbalimbali za kimazingira zilizopo katika eneo hilo na kuzitafutia ufumbuzi.

Katika ziara hiyo ambayo kamati hiyo chini ya ufadhili wa LEAT ukifanikiwa kutembelea maeneo mbalimbali ya kata hiyo,ambapo ilijionea changamoto zilizopo, ikiwemo kubomoka kwa nyumba za wakazi wa maeneo  hayo,hali ambayo husababishwa na mafuriko yanayotokea kila msimu wa mvua.

Akizungumza mara baada ya ziara hiyo, diwani wa kata ya Kiburugwa Mheshimiwa Fatuma Shija ameishukuru LEAT pamoja na kamati hiyo kwa kufika katika Kata yake,na kwamba anaamini kuwa ujio huo utakuwa ni chachu ya utatuzi wa changamoto za kimazingira zilizopo katika eneo hilo,ambazo ni nyingi sana.

"Nashukuru mmefika katika kata yangu,kata ya Kiburugwa ina changamoto nyingi za kimazingira,ujio wenu ni faraja sana kwangu,na kwa Wananchi wa eneo hili,kwani naamini kwamba kwa kushirikiana, sisi,ninyi LEAT pamoja na wadau wengine, changamoto mlizozibaini zitapatiwa  ufumbuzi" Alisisitiza Mhe. Shija.

Naye Afisa wa LEAT ambaye pia  ni mratibu wa mradi,wakili Teresia Fabian ameeleza hatua watakazochukua baada ya changamoto walizoziona ili kutatua,ambapo amesema"Tumetembea ,tumeona,kama ambavyo  Mhe. Diwani amesema,changamoto ni kubwa,kuna suala la ujenzi holela wa makazi hapa,ambao kutokana na huo , hata ujenzi wa mifereji ya kupitisha maji katika eneo hili ni mgumu, pili ardhi ya eneo hili ni changamoto kubwa kwani ni ya kichanga,ukichanganya na kutokuwepo kwa mifereji ,pamoja na sehemu ya eneo hili kuwa bonde,ambalo tumesikia hapa kwa wenyeji kwamba bonge hili limesababishwa na shughuli ya uchimbaji wa  mchanga ambayo ilikuwa ikifanyika miaka 30 iliyopita, imesababisha eneo hili kukumbwa na mafuriko ya mara kwa mara, ambayo yanasababisha nyumba kubomoka na uhalibifu wa mali nyinginezo za wakazi wa eneo hili,ikiwemo samani .

Vile vile imesababisha kuwepo kwa makorongo katika baadhi ya maeneo,ambapo ili kuziba makorongo hayo ,taka zimekuwa zikitumika.

Tutakachokifanya kwanza ni kutoa elimu kwa Wananchi wa eneo hili.Tutaangalia pia na msaada mwingine tutakaoweza kutoa.

Kuhusu takataka kutumika kufukia makorongo,wakili Fabian amesema kwamba  sheria za Mazingira haziruhusu kufanya hivyo,lakini wamekwisha shauriana na Mhe. Diwani pamoja na maafisa Mazingira wa Manispaa,kuhusu chakufanya katika eneo la Kwashego ambalo limegeuzwa eneo la kutupia taka(dampo),kwamba litafutwe greda, eneo Hilo lisawazishwe,kisha vimwagwe vifusi,visambazwe, lipandwe majani ( ukoka) na miti.Lakini pia ulinzi uimarishwe,ili watu wasiendelee kutupa taka.

Naye Afisa Mazingira wa manispaa ya Temeke bibi Fina Benard amesema kwamba wameona changamoto zilizopo katika eneo hilo,atafikisha taarifa kwenye ngazi husika,na kwamba anaamini suluhisho litapatikana.

Mkoa wa Dar es Salaam kama ilivyo kwa baadhi ya mikoa hapa Nchini, una changamoto  nyingi za kimazingira.LEAT kupitia mradi wake wa kuelimisha wanawake vijana na jamii kwa ujumla kuhusu haki ya kuishi katika mazingira safi na salama,kwa kushirikiana na wadau mbalimbali  wa Mazingira pamoja na Manispaa za Mkoa huo  imekuwa ikifanya shughuli mbalimbali  kupunguza changamoto hizo.Miongoni mwa shughuli wanazozifanya ni kutembelea maeneo yenye changamoto ,kubainisha changamoto hizo na kuzitafutia ufumbuzi kwa kushirikiana na mamlaka husika.