LEAT na Mikakati Madhubuti Kutatua Changamoto za Kimazingira Mkoa wa Dar es Salaam

Posted on: April 15th, 2021

Meneja mradi ambae pia ni Afisa wa LEAT, Wakili Teresia Fabian,akizungumza na waandishi wa habari katika mahojiano mafupi yaliyofanyika wakati wa Mkutano huo.

Wajumbe wa kamati za Mazingira kutoka  manispaa zote za Mkoa wa Dar es Salaam, wakiwa katika majadiliano,wakati wa mkutano huo.

Kamati za mazingira Mkoa wa Dar es Salaam chini ya uratibu wa asasi isiyokuwa ya kiserikali ya 'Lawyers Environment Action Team' (LEAT) kwa mara nyingine tena zimekutana katika hoteli ya 'Rombo Green View' iliyopo Shekilango .

Meneja mradi wa kulinda haki za kimazingira kwa wanawake,vijana,wasichana na jamii kwa ujumla,kupitia kuwezesha jamii katika masuala ya kisheria mkoa wa Dar es Salaam, Wakili Teresia Fabian ameeleza lengo la mkutano huo ambapo amesema kwamba kamati za mazingira ambazo ziliundwa ili kuainisha changamoto za kimazingira,na baada ya kuziainisha,kuzitafutia utatuzi, kwa kushirikiana na LEAT zimekutana ili kujadili na kuainisha maeneo yenye changamoto,na baada ya kuziainisha,LEAT pamoja kamati hizo watafanya ziara katika maeneo hayo.

"Katika utekelezaji wa shughuli za mradi,ziliundwa timu za watu saba katika kila Manispaa,ambao ni Waheshimiwa Madiwani 2,Maafisa Mazingira 2,Mtendaji wa Kata mmoja,Afisa Maendeleo ya Jamii mmoja,pamoja na Afisa Habari. 

Timu hizi zinafanya kazi kwa karibu na wenyeviti wa mitaa,pamoja na maafisa Afya wa Kata.Baada ya timu hizo kuundwa, tulikutana,tukajadili,kisha tukaainisha maeneo yenye changamoto za kimazingira,tukafanya ziara katika maeneo hayo,baada ya ziara tulikutana tena, tukajadiliana kuhusu changamoto tulizokutana nazo huko,na kutoa masuluhisho juu ya namna ya kutatua changamoto hizo. 

Baada ya ziara hizo ambayo zilikuwa na mafanikio makubwa,leo tumekutana tena hapa,kila timu itakaa,itajadili na kuanisha maeneo ya kufanya ziara na changamoto zilizopo katika maeneo hayo ,kile tulichokifanya katika ziara zilizopita kwenye maeneo tuliyotembelea,tunakwenda kukifanya tena katika maeneo mengine" Alisisitiza Wakili Fabian.

Katika mkutano huo kila kamati imeainisha maeneo ya kwenda kutembelea,changamoto zilizopo ,vifaa vinavyohitajika ili kutatua changamoto hizo.

Aidha kila kamati imependekeza tarehe ya kufanya ziara katika maeneo yake ,ambapo ziara hizo zinatarajiwa kufanyika kati ya tarehe 19/04 hadi  27/04/2021.

Kwa manispaa ya Temeke maeneo yatakayotembelewa ni Kata ya Kijichi,mtaa wa Misheni  na Kijichi,Kata ya Mbagala Kuu, mtaa wa Mbagala Kuu Mashariki.

LEAT ni asasi isiyo ya Kiserikali inayojishughulisha na masuala mbalimbali ya mazingira,ikiwemo utatuzi wa changamoto za kimazingira,kwa kushirikiana na wadau mbalimbali ,kutoa msaada wa kisheria,pamoja na utoaji wa elimu kwa jamii kuhusu haki ya kuishi katika mazingira salama,na utunzaji wa mazingira.