MAMIA YA MAMA NA BABA LISHE TEMEKE WAKABIDHIWA MAJIKO NA MITUNGI YA GESI

Posted on: March 7th, 2024

Na: Joanita Joseph -TMC Habari

Katika kuhamasisha wananchi kutumia nishati safi na bora ya kupikia Nchini.

Leo Machi 7, 2024 Naibu Waziri Mkuu na Waziri wa nishati Nchini Mhe. Dkt. Dotto Mashaka Biteko amekabidhi mitungi ya gesi aina ya 'ORYX' na majiko kwa mama na baba lishe takribani 100 wilayani Temeke ikiwa ni katika utekelezaji wa mpango wa Mhe. Rais wa Jamhuri ya Muungano wa Tanzania Dkt. Samia Suluhu Hassan wa nishati safi ya kupikia Afrika aliouzindua katika mkutano wa dunia mnamo mwaka jana 2023.

Dkt. Biteko amesema kuwa ni muhimu kuweka mkakati maalum wa kutumia nishati safi ya kupikia ili kuepuka madhara ya kiafya kutokana na matumizi ya nishati isiyo safi.

"Safari ya nishati safi ya kupikia imeanza rasmi hapa nchini, tunataka tuwaone akina mama wa kitanzania wanahama kwenye matumizi ya nishati isiyokuwa safi, na nishati safi ili uweze kuifikia ni lazima serikali ifanye uwekezaji na uwekezaji umeanza. "Alisema Dkt. Biteko.

Vilevile Dkt. Biteko ametoa rai kwa viongozi wa serikali pamoja na taasisi kuipa uzito agenda ya nishati safi ili kuboresha maisha ya Mtanzania na maendeleo hapa Nchini.

"Niendelee kuziomba kampuni nyingine zinazozalisha mitungi ya gesi ama nishati nyingine zisibaki nyuma, wafanye kila wanaloweza kuhakikisha watanzania wanapata nishati safi na wanapata maendeleo". Alisema Dkt. Biteko

Aidha Dkt. Biteko ametoa ahadi juu ya umalizaji wa tatizo la upungufu wa umeme kwa wakazi wa mbagala.

"Ninyi wenyewe mmekuwa mashahidi kwa miezi hii miwili hatujafanya mgao wa umeme, hivyo niwaahidi suala hili linakwenda kwisha hivi punde kwakuwa uboreshaji tayari umeshaanza na muda si mrefu unakwenda kukamilika." Alisema Dkt. Biteko

Kwa upande wake Mkuu wa mkoa wa Dar-es-salaam Mhe. Albert Chalamila amemshukuru Mhe. Naibu Waziri hususani katika utatuzi wa changamoto za Nishati hapa Nchini.

"Naibu waziri Mkuu wewe umesimama imara sana katika kuhakikisha sekta unayoisimamia haya malalamiko yote yanakwisha au yanapungua kwa asilimia kubwa sana ". Alisema Mkuu wa mkoa wa Dar-es-salaam.

Hafla hiyo imefanyika katika viwanja vya zakhiem, Mbagala wilayani Temeke.