MASHINDANO SHIMISEMITA YAZINDULIWA RASMI

Posted on: October 24th, 2022

Nassoro Rashid

TMC Tv

Leo Oktoba 24, 2022 kaimu mkuu wa mkoa ambaye pia ni  mkuu wa wilaya ya Malinyi Mhe. Mathayo Masele amezindua rasmi mashindano ya Shirikisho la Michezo Serikali za Mitaa Tanzania(SHIMISEMITA) katika Uwanja wa Jamhuri Morogoro na kuhudhuriwa na wakuu wa wilaya, mwenyekiti SHIMISEMITA Taifa, TAMISEMI pamoja na washiriki mbalimbali.

Katika uzinduzi huo uliowashirikisha wachezaji kutoka  Halmashauri 44 za wilaya pamoja na manispaa nchini umeonesha hamasa kubwa kwa Viongozi, Watumishi pamoja na Wananchi waliohudhuria  kwa kuona jinsi gani michezo ni sehemu ya maisha ya kila siku.

Akizungumza kwa niaba ya mkuu wa mkoa Mhe. Masele amesema wana furaha kubwa mashindano hayo kufanyika Morogoro, na ameahidi kutoa ushirikiano kwa  washiriki  mpaka watakapomaliza mashindano hayo, huku akiwashukuru waratibu wa mashindano hayo kwa kuiweka Nchi katika ramani ya michezo kwa Watumishi.

"Nimeambiwa mashindano haya ni ya 37 tangu kuanza kwake, niwaombe nyie mliofika muendelee, kwani michezo ni afya, urafiki na uchumi, tuendelee kumshukuru Rais wa Tanzania Mhe. Samia Suluhu Hassan kwa kutujali wanamichezo lakini pia kuzijali afya za Watumishi". Alisema Mhe. Masele

Naye Mwenyekiti wa SHIMISEMITA Taifa  amesema walianza mashindayo hayo rasmi Oktoba 18, na wanatarajia kumaliza ifikapo Oktoba 31, 2022 huku akitoa rai kwa Viongozi wa Halmashauri kupanga bajeti mapema ili mashindano ya mwakani yawe katika hali nzuri zaidi.

"Bahati nzuri tunao viongozi wa TAMISEMI hapa ,tunawaomba katika bajeti mbali mbali zinazopelekwa na Halmashauri, kipengele cha kukipa uzito unaostahili kuona je watu hawa afya zao zinalindwa namna gani kwa kuweka bajeti katika kipengele cha SHIMISEMITA". Alisema Mwenyekiti

Mashindano haya yameibua hisia kubwa kwa Watumishi wa serikali za mitaa mara baada ya miaka 8 kupita huku yakionesha matumaini makubwa ya kuimarisha afya, uchumi na uhusiano kwa watumishi ikiwa yataendelea kupewa kipaumbele kila mwaka nchini.