Milioni 189 kunufaisha wanawake Temeke.

Posted on: October 23rd, 2019

Mkuu wa wilaya ya Temeke Mhe. Felix Lyaniva amekabidhi gari pamoja na vifaa vya kuzolea taka,vyenye thamani ya shilingi 189,000,000 kwa  jukwaa la uwezeshaji wanawake kiuchumi kata ya Miburani.

Tukio hilo la makabidhiano ambalo limekwenda sambamba na uzinduzi wa gari lililokabidhiwa limefanyika katika viwanja vya ofisi za manispaa ya Temeke.

Akizungumza kabla ya  kukabidhi gari pamoja na vifaa hivyo, Mhe. Lyaniva amewaasa wanajukwaa wa Miburani kuendelea kushirikiana katika kufanya kazi,kushirikiana kutunza gari pamoja na vifaa  na kuendelea  kuwaheshimu viongozi na wataalamu wa manispaa kwani wao ndio waliowawezesha kufika mahali walipofika.

'' Muwe kitu kimoja katika kufanya kazi,  mmepewa gari na vifaa hivyo, huo ni mkopo usio na riba, mmepewa miaka 3 ya kurudisha,mkishindwa kurudisha,maana yake ni kwamba mkopo huo unarudi, wanapewa watu wengine.

Mimi naomba mshikamane,muwe kitu kimoja, mmeshapata vifaa, mmeshapata gari, msije mkafika mahali mkawa hamsikilizani tena, mnawadharau wataalamu wa Manispaa ambao ndio wamewawezesha kupata mkopo huu.''

Akionyesha kufurahishwa na tukio hilo Mstahiki Meya wa manispaa ya Temeke Mhe. Abdallah Chaurembo  amesema kwamba mkopo waliopewa hauna riba, washirikiane kuhakikisha kwamba wanamaliza kulipa,ili gari hiyo iwe ya kwao, waendelee kuifanyia kazi iwasaidie kujikwamua kiuchumi.

Naye Mkurugenzi wa manispaa ya Temeke ndugu Lusubilo Mwakabibi amesema kwamba yeye pamoja na wasaidizi wake watafuatilia utunzwaji wa gari hilo ili  liweze kufanya kazi iliyokusudiwa na kuwanufaisha wanawake hao kiuchumi.''Alisisitiza Mhe. Lyaniva.

Katika hatua nyingine diwani wa kata ya Miburani Mhe. Juma Mkenga ameshukuru kwa wanawake wa kata yake kupata mkopo huo, ambapo amesema kwamba upatikanaji wa vifaa vivyo utawezesha kazi ya uzoaji taka ngumu kufanyika kwa  wepesi na kwa ufanisi zaidi.Vile vile amemshukuru Mkuu wa wilaya ya Temeke kwa kutoa wazo la kuanzisha ukopeshaji wa vifaa kwa vikundi vya ujasiliamali,kwani wazo hilo ndilo liliwezesha upatikanaji wa vifaa hivyo.

Jukwaa la uwezeshaji wanawake kiuchumi kata ya Miburani ni miongoni mwa majukwaaa yaliyoanzishwa na makamu wa Raisi wa jamhuri ya Muungano wa Tanzania Mhe. Samia Suluhu  Hassan, Lengo la majukwaa hayo ni kuwaunganisha wanawake ili wawe na sauti moja yenye nguvu,ya kuwawezesha kutambua fursa mbalimbali za kiuchumi na kuwawezesha kutatua changamoto za kiuchumi zinazowakabili.