MKURUGENZI TEMEKE AELEZA MAFANIKIO

Posted on: September 28th, 2022

Na Shalua Mpanda

Mkurugenzi wa halmashauri ya manispaa ya Temeke ndugu Elihuruma Mabelya amekutana na wandishi wa Habari  leo Septemba 28,2022 kueleza mafanikio ambayo yamepatikana kwa kipindi cha mwaka wa fedha 2021/22.

Mkurugenzi Mabelya ameeleza kuwa katika kipindi hicho manispaa ya Temeke ilipanga kukusanya kiasi cha shilingi bilioni 37 lakini ikakusanya bilioni 39 sawa na asilimia 106%.

Kwa upande wa elimu sekondari,Manispaa imeweza kutekeleza miradi mbalimbali yenye thamani ya shilingi bilioni 4.8 ikiwa ni pamoja na ujenzi wa vyumba vya madarasa 175,bweni 1,bwalo 1,matundu ya vyoo 90,maabara 12,shule mpya moja na miundombinu ya maji.

"Mafanikio haya yametokana na ushirikiano mkubwa wa Baraza la madiwani likiongozwa na Mstahiki meya Mtinika,wamekuwa wakituongoza pale walipoona tunakosea, tunawashukuru sana".Alisema

Pamoja na kuainisha mafanikio katika sekta zote ikiwemo afya,maendeleo ya jamii,ujenzi nk,Mkurugenzi amesisitiza juhudi na uwajibikaji katika kazi ili kuendelea kuhudumia Wananchi kwa kuwa maendeleo hayana kikomo.

Aidha amewashukuru Wananchi kwa kuelewa umuhimu wa kulipa kodi na tozo mbalimbali hali inayochangia kuongezeka kwa mapato ya ndani ambayo yanawezesha kujenga miundombinu.

Pia amemshukuru mheshimiwa Rais Samia Suluhu Hassan kwa kuendelea kutoa fedha katika Manispaa hii ambapo amesema katika kuboresha sekta ya afya,serikali Kuu imetoa kiasi cha shilingi bilioni 2 kufanya upanuzi wa hospitali ya Mbagala Rangitatu.

Manispaa ya Temeke imepanga kukusanya kiasi cha shilingi bilioni 43 kwa mwaka wa fedha 2022/23 ,ili kufikia lengo hilo,Mkurugenzi amewasihi Wananchi kuendele kuunga mkono juhudi za Serikali kwa kulipa kodi.