MKUTANO WA KWANZA WA MADIWANI WAFANYIKA, UCHAGUZI KUMPATA MEYA MPYA

Posted on: December 3rd, 2025

Na Joanita Joseph, TMC habari

Baraza Jipya la Madiwani la Halmashauri ya Manispaa ya Temeke limekutana leo Desemba 3, 2025 na kumchagua Mhe. Uzairu Abdul Athuman kuwa Mstahiki Meya huku Mhe. Nuru Cassian Bayingana akiwa Naibu wake.

Tayari Madiwani wameunda Kamati za kudumu na zisizo za kudumu kwa Mujibu wa Kanuni na Sheria na kuchagua Wenyeviti wao, huku Mstahiki Meya Uzairu akitoa Dira na Mwelekeo wa Baraza analolitaka akiahidi kuiongoza Manispaa ya Temeke kuwa ya Viwango na Kisasa ikiwa ni pamoja na kuhakikisha Utekelezaji wa Ahadi za Rais Dkt. Samia Suluhu Hassan alizozitoa ndani ya siku 100 toka alivyoapishwa zinafanyika, kusimamia Matumizi sahihi ya Rasilimali fedha na watu ndani ya halmashauri, kusimamia Mipango na utekelezaji wa Miradi ya maendeleo, uwezeshaji wa Vijana katika kuwapatia fursa za ajira, Mikopo na utekelezaji wa Mipango ya Wizara mpya ya Vijana.

Kwa upande wake Katibu Tawala Msaidizi Ukaguzi na Ufuatiliaji Mkoa wa Dar es salaam amebainisha kuwa Temeke ni miongoni mwa Injini ya uchumi katika Mkoa wa Dar es salaam hivyo kutoa Wito  kwa Madiwani kusaidiana na Mkurugenzi kukusanya mapato, kusimamia Watumishi na kuepuka migogoro inayotokana na kutofuata Sheria na taratibu.