MKUU WA IDARA YA USAFI NA MAZINGIRA TEMEKE AHIMIZA UPANDAJI MITI.

Posted on: February 9th, 2022

Siku ya Januari 28,2022 Mkuu wa idara ya usafi na mazingira manispaa ya Temeke Bw.Ally Khatib kwa niaba ya Mkuu wa wilaya hiyo Mheshimiwa Jokate Mwegelo ameendesha zoezi la upandaji miti kwa kushirikiana na Taasisi ya ‘Raleigh Tanzania Society’ katika shule ya  sekondari Dovya iliyopo kata ya Chamazi wilayani Temeke.

Katika zoezi hilo  Khatib alieleza umuhimu wa zoezi la upandaji miti katika shule na mazingira mengine kwa ujumla huku akifafanua sababu iliyofanya kupanda miti ya matunda.

“Tunaishukuru sanataasisi hii ya Raleigh kwa kushirikiana nasi katika zoezi hili la upandaji miti,mnafahamu hali ya mabadiliko ya tabia ya Nchi na namna yanavyoathiri mazingira yetu kwa kugundua hili tumekutana hapa na kupanda miti mbalimbali hasa ya matunda ambayo sio tu itatoa kivuli kwa watoto wetu wakiwa shule bali itatunza mazingira na kutoa matunda kwaajili ya afya”.Alibainisha Mkuu huyo wa Idara

Pia alitoa wito kwa wanafunzi hao kutunza  miti hiyo huku akisisitiza kuanzisha na kuendeleza desturi ya utunzaji mazingira hasa mashuleni.

“Katika mikakati ya utunzaji mazingira tumeanzia na shule kwasababu itakua desturi, hapa ni mahali ambapo vijana wetu wanapata elimu ya utunzaji mazingira na mazoezi ya kutunza miti waliyoipanda wenyewe na kuendeleza desturi kwa jamii. Natoa wito, hasa kwa wakazi wa Temeke tuhakikishe tunapanda miti kwa ajili ya kutunza mazingira yetu ambayo kwa kiasi yameharibiwa na shuguli za watu za kila siku".Aliongeza Bw.Khatib

Kwa upande wake mwakilishi kutoka Raleigh Bi. Karen Khan alifafanua nia ya upandaji miti katika shule na mazingira mengine tofauti.

“Kupitia kampeni ya mazingira inayoitwa “Kesho Tutachelewa” tunaendesha zoezi la kupanda miti ,tumejikita katika kuleta mabadiliko binafsi katika utunzaji mazingira ili kukabiliana na mabadiliko ya tabia ya nchi. Tunaamini mazingira bora yanahamasisha elimu bora,wanafunzi watapata chachu ya kutunza mazingira na kuwa na uelewa mzuri kwamba wanapaswa kutunza mazingira ili kukabiliana na changamoto za kimazingira”.

Naye Mkuu wa shule ya sekondari Chamazi na mlezi wa ujenzi wa shule hiyo mpya ya sekondari Dovya Mwalimu Emetrudius Chilewa alisema.

“Tunawashukuru sana Raleigh na viongozi wa wilaya ya Temeke kwa kutuletea miti na naahidi miti hii yote itatunzwa, wanafunzi hawa waliopanda hii miti wataitunza na watajivunia kwasababu kila mti hapa utaitwa jina la huyo mwanafunzi” alisema Mwl. Chilewa.

Nao wanafunzi wa shule hiyo kupitia mwakilishi wao Mohammed Alli mwanafunzi wa kidato cha kwanza alisema

“Asanteni kwa kutupandia miti na kutambua shule yetu haina miti,tunajarajia kupata kivuli,matunda na tunashukuru Mhe. Rais kwa kutujengea shule nzuri,tumeipenda na tunafurahi kusoma hapa bila kubanana”

Wilaya ya Temeke imekua mstari wa mbele katika kuhakikisha mazingira yanatunzwa kwa kusimamia usafi na upandaji miti ili kukabiliana na magonjwa ya mlipuko na mabadiliko ya tabia ya Nchi.