NINA IMANI KUBWA SANA JUU YENU- MD SATURA AWAFUNGUKIA WANAMICHEZO TEMEKE

Posted on: August 23rd, 2025

Mkurugenzi wa Manispaa ya Temeke Ndg. Jomaary Satura amezungumza na Wanamichezo wanaoshiriki Mashindano ya SHIMISEMITA 2025 Jijini Tanga na kuwapongeza kwa juhudi kubwa na kujitoa kwao pamoja na kuwatia moyo katika mashindano hayo na kuwataka kuendelea kuilinda na kulitaja vizuri jina la manispaa ya Temeke.

Akizungumza katika kikao kifupi kilichofanyika mara baada ya uzinduzi wa mashindano, Satura ameeleza kuwa licha ya ujio wake katika uzinduzi amefurahishwa na bado anayo imani kubwa kwa timu zake. Amesema

“Mimi nimekuja kuwapongeza kwa jitihada kubwa mnazofanya na kuwasalimia ili kujua mnaendeleaje. Kwa kweli ninayo imani kubwa sana juu yenu, mnapambana na tunaona juhudi zenu, nimekuwa mfuatiliaji mzuri wa kila kinachoendelea huku nafahamu kila kitu, nafurahishwa tunakwenda vizuri licha ya changamoto za hapa na pale. Nafahamu ugumu wa mashindano, mimi niliwahi kushiriki mchezo wa kuvuta kamba kwa kweli inahitaji nguvu maana nilinyanyuliwa juu lakini kwa kujitoa kwenu mnafanya vizuri huko pia na pongezi ziwafikie timu ya ‘netball’ kwa ushindani mnaoutoa”

Aidha mkurugenzi Satura ameeleza kuwa ujio wake katika uzinduzi wa mashindano hayo umemuwezesha kupokea maelekezo ya moja kwa moja kutoka kwa mhe. Naibu waziri TAMISEMI na kuwaahidi Wanamichezo kuyafanyia kazi maelekezo hayo.

“Lakini pia nimepokea maelekezo ‘direct’ kutoka kwa mhe. Naibu Waziri Katimba kitu ambacho ni chema zaidi. Tunacho ahidi kama halmashauri na kama yalivo maelekezo ya timu zetu zitaendelea kushiriki, sio tu kwasababu tunafanya vizuri katika eneo la ukusanyaji wa mapato ni kwasababu pia ya ‘welfare’ ya Mtumishi. Tutakaporudi kwenye maeneo yetu ya kazi tukafanye kazi vizuri na kwa ushirikiano ili tutengeneze mazingira ya kushiriki tena na tena”

Mkurugenzi Satura amewataka Wanamichezo kuzungumza mambo mazuri yanayopatikana Temeke ili kutoa fursa kwa halmashauri nyingine kujifunza na kuyajua mema yanayopatikana Temeke.