NMB YAKABIDHI VIFAA VYA UEZEKAJI KWA DC TEMEKE.

Posted on: February 9th, 2022

Mkuu wa Wilaya ya Temeke Mheshimiwa Jokate Mwegelo siku ya Februari 03, 2022 amekabidhiwa vifaa vya uezekaji na benki ya NMB vyenye thamani ya shilingi 13,000,000 katika hafla fupi iliyofanyika shule ya msingi Keko Magurumbasi yenye lengo la kuisaidia kuezeka baadhi ya madarasa ya shule hiyo na shule ya msingi Buza zilizopo wilayani Temeke.

Akizungumza katika hafla hiyo Mhe. Jokate amewashukuru sana wadau wa benki ya NMB kwa mchango huo na kujitoa kwao katika kuchangia maendeleo mbali mbali katika jamii na kuwa wadau wakubwa kwa kushirikiana na kumuunga Mhe. Rais Samia Suluhu Hassan kwa vitendo.

Pia ameongezea kwa kuwaomba benki ya NMB kutokuishia hapa katika kujitolea na kuwataka waendelee kushirikiana katika kujenga jamii ziwe bora zaidi ili wao waendelee kutimiza malengo yao na serikali itimize malengo yake kwani wote wanajenga nyumba moja kwa ajili ya Tanzania.

Kwa namna nyingine Mkuu wa Wilaya amesema kuwa Mhe. Rais amewekeza kiasi kikubwa katika kuboresha miundombinu itakayoendeleza sekta ya elimu kwa sababu inagusa maisha ya watoto na vijana.

"Kwa sababu ukishika elimu, ukiboresha elimu unawasaidia vijana kukua katika malezi bora lakini pia kuwasaidia kuwa na maono juu ya maisha yao, kwahiyo Mhe. Rais amewekeza moyo wake katika kiwanda ambacho kinazalisha watoto na vijana ambao Taifa linaenda kuwategemea" Alisema Mhe. Jokate.

Sambamba na hayo Mkuu wa Wilaya amesisitiza lazima tuwahakikishie tunawapa vijana wetu silaha zote za wao kwenda kwenye mapambano duniani, kwa kuwafunza matumizi sahihi ya Tehama ili kushindana katika soko la dunia pia kupambana na changamoto ya kasi ya dunia ya sasa na ya baadae.

Naye Meneja wa NMB Kanda ya Dar es salaam Ngudu Donatus Richard amesema wao ni wadau wakubwa wa maendeleo na wamekabidhi Mabati 222, Mbao 420 pamoja na Kilo 410 za misumari ili kufanikisha kuwezekwa kwa mabati katika shule hizo lengo kuunga mkono kwa vitendo juhudi za serikali katika kuendeleza sekta ya elimu nchini.

Kwa namna yake Mkuu wa Shule ya Buza Ndugu Michael Kabuta ameongea kwa niaba ya shule zote huku akitoa shukrani zake za dhati kwa NMB kwa kuwakabidhi vifaa hivyo na kutoa wito kwa wadau wengine wa maendeleo kuendelea kuunga mkono serikali katika kusaidia taasisi mbali mbali zenye uhitaji wa namna hiyo.