"TUNAMSHUKURU SANA MHE. RAIS KWA KUTUPUNGUZIA MZIGO'' MSTAHIKI MEYA TEMEKE

Posted on: November 19th, 2021

Novemba 19,2021 Meya wa halmashauri ya manispaa ya Temeke mheshimiwa Abdallah Mtinika ameendesha baraza la madiwani kwa robo ya kwanza(Julai-Septemba) baraza lililohudhuriwa na maafisa kutoka taasisi za Umma ikiwemo TANESCO na DAWASA, huku mkuu wa wilaya ya Temeke Mhe. Jokate Mwegelo na mkurugenzi wa manispaa ndugu Elihuruma Mabelya wakihudhuria kwa mara ya kwanza.

Katika kikao hicho mstahiki meya Mtinika amepokea taarifa kutoka Kata,kufafanua ajenda muhimu za Manispaa na kutoa shukrani za dhati kwa rais Samia Suluhu Hassan kwa kutoa fedha za UVIKO -19 kiasi cha Shilingi Bilioni 3.4 kwa Manispaa ya Temeke kwa ajili ya ujenzi wa vyumba 157 vya madarasa.

"Tunamshukuru Mhe. Rais Samia Suluhu Hassan kwa kutupunguzia mzigo tuliokua nao na kuongeza lengo kwa sababu tulikua na mpango wa kujenga vyumba vya  madarasa 145, fedha hizi zimetufikisha madarasa 157.

Na kwa suala la kuwapanga wafanyabiashara ndogo ndogo (wamachinga) halmashauri yetu imefanya vizuri, ajenda inayofuata ni kusafisha mji wetu.

Katika baraza hili pia tumeanza kuonesha matunda ya muungano wa kitaasisi hasa kwa baadhi ya taasisi zinazotoa huduma kwa Wananchi kwa maana tukikutana ndipo tunaijenga Temeke yetu kwa kujua vipaumbele vya Wananchi na hii ndiyo Tanzania ya mama Samia Suluhu Hassan." Alisema Mhe. Mtinika.

Aidha Mhe. Mtinika ametoa wito kwa taasisi zote zilizopo Temeke kutenga muda wa kuhudhuria vikao vya baraza la madiwani ili kuungana kusaida serikali na kuwatumikia Wananchi kwa namna inayofaa.

Kwa upande wake mkurugenzi Mabelya  ametoa shukrani zake kwa Rais Samia Suluhu Hassan na kueleza hali ya ujenzi wa madarasa Temeke ambapo amesema.

"Hali ya ujenzi wa vyumba vya madarasa iko vizuri na tunatarajia kufikia Disemba 08 tutakua tumepaua vyumba vyote".

Naye mkuu wa wilaya Mhe. Jokate Mwegelo amemshukuru Mhe. Mtinika na madiwani kwa ujumla kwa kumualika kwa mara ya kwanza kuhudhuria baraza hilo. Alisema

"Nipende kukushukuru Meya Mtinika na baraza lako kwa jinsi mnavyoendesha Manispaa yetu,nashukuru kwa kunialika na kunitambulisha,naendelea kusisitiza tufanye kazi kwa umoja,ushirikiano na mshikamano,tuendelee kusimamia ilani ya Chama Cha Mapinduzi(CCM) kwa faida ya Wananchi"

Baraza la madiwani limeanzisha utaratibu wa kualika taasisi zinazohudumia Wananchi moja kwa moja ili kuleta msukumo kwa taasisi hizo kupata maoni kutoka kwa madiwani ambao ni wawakilishi wa Wananchi, lengo ni kuhakikisha matakwa  yanatimizwa.