RC CHALAMILA AWATAKA WAKUU WA WILAYA DSM KUIGA MFANO TEMEKE

Posted on: September 16th, 2023

Na Shalua Mpanda, TMC

Maadhimisho ya Siku ya Usafi Duniani yameadhimishwa leo Septemba 16, 2023, ambapo Mkuu wa Mkoa wa Dar es Salaam, Mheshimiwa Albert Chalamila, alikuwa mgeni rasmi katika maadhimisho hayo yaliyofanyika katika viwanja vya Zakhiem Mbagala, wilayani Temeke.

Akizungumza katika maadhimisho hayo yaliyoanza kwa matembezi ya mwendopole (jogging) na zoezi la usafi, Mkuu huyo wa Mkoa ameupongeza uongozi wa Halmashauri ya Manispaa ya Temeke na Mkuu wa Wilaya kwa kuwa kinara katika kampeni ya usafi mkoani Dar es Salaam.

Mhe. Chalamila amesema katika mkoa wa Dar es salaam Manispaa ya Temeke pekee ndio yenye kampeni kubwa ya usafi na viongozi wake wakiongozwa na Mkuu wa Wilaya Mhe. Mobhare Matinyi, wamekuwa mstari wa mbele kusimamia usafi.

"Mkuu wa Wilaya na menejimenti yote ya Manispaa Temeke imekuwa na kazi nzuri sana ya kusimamia usafi na nitoe rai na wito kwa wakuu wa wilaya, mameya na wakurugenzi wote wa mkoa wa Dar es Salaam kuiga mfano wa kampeni inayofanywa Temeke," alisema Mhe. Chalamila.

Akimkaribisha Mkuu wa Mkoa kuzungumza na wananchi pamoja na wadau wa usafi, afya na mazingira, Mkuu wa Wilaya Mhe. Matinyi alisema kuwa kwa kuona umuhimu wa usafi wa mazingira wana-Temeke waliamua kuanzisha wiki ya usafi iliyozinduliwa Septemba 11 mwaka huu kwa kufanya shughuli mbalimbali zikiwemo usafishaji wa mitaro, mifereji, masoko na mitaa.

Maadhimisho hayo ya Siku ya Usafi Duniani yamefikia kilele leo hii lakini Mhe. Matinyi ametumia nafasi hiyo kutangaza wiki mbili zaidi za kuendelea na kampeni ya usafi kulenga mitaro na mifereji ili kujiandaa na mvua za El Nino zitakazoanza mwezi Oktoba.