RC MAKALLA AAGIZA MICHORO SHULE YA GHOROFA BUZA

Posted on: June 17th, 2022

Kuelekea utatuzi wa changamoto ya uhaba wa vyumba vya madarasa inayozikabili shule nyingi Nchini hususani katika mkoa wa Dar es Salaam, mkuu wa mkoa Mheshimiwa Amos Makalla amemuagiza Mkurugenzi wa manispaa ya Temeke na Mhandisi kumkabidhi michoro ya ghorofa itakayosaidia kutatua uhaba wa vyumba 60 vinavyohitajika katika shule ya msingi Buza.

Hayo yamesemwa leo Juni 17,2022 katika viwanja vya shule ya msingi Buza ambako Mhe. Makalla amefanya ziara akiambatana na mkuu wa wilaya ya Temeke Mhe. Jokate Mwegelo, Mshatiki Meya Abdallah Mtinika, Mkurugenzi wa manispaa Ndugu Elihuruma Mabelya na Wakuu wa idara mbalimbali za manispaa ambapo alitembelea kujionea hali halisi ya miundombinu iliyopo, inayotekelezwa na iliyopo kwenye mipango ya mbeleni. Alisema.

"Nimethibitisha shule ya msingi Buza kuna Wanafunzi wengi, na kwa hali halisi niliyoikuta hapa hilo eneo la kujenga madarasa 60 yanayohitajika halipo, kadri muda unavyokwenda tutahitaji madarasa zaidi na hututakua na mahali pa kuyajenga, maagizo yangu kwa Mkurugenzi na Mhandisi, nawapa mwezi mmoja mniletee michoro ya ghorofa litakalotatua changamoto ya uhaba madarasa yanayohitajika hapa, bila kuathiri kiwanja cha michezo"

Aidha Mhe. Makalla amepongeza Walimu wa shule hiyo, Wanafunzi, Uongozi wa shule na Manispaa kwa ujumla kwa ufaulu wa kuridhisha na ulinzi uliopo katika shule hiyo.

"Buza ni eneo maarufu Dar es Salaam, lakini mmefanikiwa kulilinda eneo hili kwa kuweka uzio katika eneo lote la shule, watoto wetu wako salama na wanafaulu vizuri, kwa miaka mitatu mfululizo ufaulu kwa darasa la 7 si chini ya 93% kutoka 85% mwaka juzi (2020) hii inaonesha kazi kubwa inayofanywa na walimu licha ya kuwa na jumla ya watoto 4,515 hapa" alisema RC Makalla.

RC Makalla anaendelea na ziara katika maeneo mbalimbali mkoani humu lengo likiwa kutatua changamoto za Wananchi na kuboresha mazingira.