SHIMISEMITA YAHITIMISHWA, TEMEKE YAIBUKA NA VIKOMBE VITATU NA MEDALI MOJA

Posted on: August 29th, 2025

Mashindano ya SHIMISEMITA 2025 yamehitimishwa rasmi leo Agosti 29, 2025 jijini Tanga kwa Ugawaji wa Medali na Vikombe mbalimbali kwa Washindi ambapo Timu ya Manispaa ya Temeke imekabidhiwa kikombe cha Mshindi wa pili kwenye mchezo wa Basketball (Wanawake), Mshindi wa Tatu mchezo wa kuvuta Kamba (Wanawake), Mshindi wa Tatu mchezo wa Darts (Vishale) na medali ya mshindi wa pili (riadha) kwa watu wenye mahitaji maalum.

Kwa upande wa Kombe la Basketball limekabidhiwa na Ndg. Charles Mazugu, Afisa Michezo mwandamizi kutoka Baraza la Michezo Tanzania (BMT) na Kaimu Mkurugenzi Jiji la Arusha, Bi. Deborah Ngagaji.

Akizungumza baada ya kukabidhiwa vikombe Mkuu wa kitengo cha Utamaduni Bi. Sauda Salum amesema

“Manispaa ya Temeke tumeshiriki michezo yote kama ilivyo orodheshwa na shirikisho na tumefanikiwa kupata vikombe vitatu na medali moja ya riadha kwa makundi maalum. Niwashukuru Wanamichezo kwa kujitoa kwao na niwapongeze kwa juhudi kubwa waliyo onesha. Tunamuahidi mkurugenzi wa manispaa (Jomaary Satura) kuwa tutaendeleza mapambano na mwakani tutapata ushindi wa jumla”

Timu ya Temeke pia imefanikiwa kushika nafasi ya sita katika mashindano ya Ngoma za asili, nafasi ya 9 kwa upande wa Kwaya (kupitia wimbo maalum), nafasi ya 11 kwa upande wa muziki wa kizazi kipya na hatua ya robo fainali kwa mchezo wa Netball na 16 bora kwa mpira wa miguu.

Wana Temeke tunamshukuru Mungu na tunasema Temeke to the Next Level!