"TAMASHA HILI NI SHAMRA SHAMRA ZA MAPOKEZI YA MWENGE WA UHURU" MHE. MWANAHAMISI

Posted on: May 22nd, 2023

Na: Sweetbetter Njige-TMC Habari

Mkuu wa wilaya ya Temeke mheshimiwa Mwanahamisi Munkunda Mei 22,2023 ameshiriki tamasha la "Kijana Janjaruka" lililofanyika katika viwanja vya Zakhem-Mbagala huku akitumia Jukwaa hilo kutoa hamasa kuhusu Mwenge wa Uhuru unaotarajiwa kukimbizwa wilayani humu siku ya Jumatano wiki hii.

Akizungumza katika tamasha hilo lenye lengo la kuwapa vijana fursa za kiuchumi,Mhe. Munkunda amesema Serikali ya awamu ya sita inayoongozwa na Mhe Rais Samia Suluhu Hassan imedhamiria kuwainua vijana kiuchumi kwa kuwapa fursa mbalimbali.

"Niwapongeze wadau wote waliojitokeza kutoa huduma mbalimbali na kutuunga mkono kutoa elimu kwa Watanzania, Temeke tunajivunia kushiriki tamasha hili, kwetu ni shamrashamra za utangulizi wa mapokezi ya mbio za Mwenge wa Uhuru lakini tamasha hili ni eneo sahihi kwa vijana kupata taarifa sahihi za huduma mbalimbali zinazotolewa na Serikali".Alisema Mkuu huyo wa wilaya.

Mhe. Munkunda amewataka vijana kuchangamkia fursa hizo zinazotolewa na wadau wanaoshiriki tamasha hilo hususani mikopo isiyo na riba kutoka kwa taasisi za kibenki zinazotambuliwa na Serikali ili kuongeza tija kwao,jamii na taifa kwa ujumla kwa kufanya kazi halali na kujiepusha na mikopo yenye lengo la kuwarudisha nyuma kimaendeleo

Katika hatua nyingine Mkuu huyo wa wilaya ya Temeke amekabidhi majiko 50 ya gesi kutoka kampuni ya ORYX kwa Mamalishe na Babalishe hilo kama sehemu ya kutia moyo Wajasiriamali hao na kuhamasisha utunzaji wa mazingira kwa kutumia nishati mbadala.

Taasisi mbalimbali za Serikali na binafsi zimejitokeza kushiriki katika Tamasha hilo na kutoa elimu kwa makundi mbalimbali yakiwemo ya vijana na wanawake juu ya kutumia fursa zilizopo katika kujikwamua kiuchumi.