TEMEKE INAKIU YA KUFANIKIWA ZAIDI-MD MABELYA

Posted on: September 28th, 2022

Na Sweetbetter Njige

Mkurugenzi wa manispaa ya Temeke Ndugu Elihuruma Mabelya leo Septemba 28,2022 amezungumza na waandishi wa Habari katika ukumbi wa Idd Nyundo na kuelezea mafanikio yaliyofikiwa na Manispaa hii kwa kipindi cha mwaka 2021-2022.

Akielezea mafanikio hayo katika idara mbalimbali za Manispaa, mkurugenzi Mabelya ameeleza kiu ya kuhitaji kufanikiwa zaidi katika ukusanyaji wa mapato, utekelezaji na ukamilishaji wa miradi ya maendeleo, utoaji wa elimu kwa vikundi vinavyopewa mikopo ya asilimia kumi na masuala mengine mbalimbali. Alisema

"Kwa umoja wetu,tumefanikiwa kuvuka lengo la makusanyo kwa mwaka uliopita ambapo tuliweza kukusanya bilioni 39.9 kutoka lengo bilioni 37, tumelenga kukusanya bilioni 43.1 kwa mwaka huu wa fedha, tumefanikiwa kusuluhisha migogoro mbalimbali ya ardhi, tumekamilisha miradi ya elimu kwa kujenga shule mpya ya sekondari Dovya, tumenunua madawati zaidi ya 7,800 kwa mapato ya ndani, tumejenga vituo vitatu vya Afya kwa jumla ya shilingi Bilioni 1.1 na mengineyo mengi, ni jambo la kujivuna sisi kama Halmashauri na tunaamini kwa mwaka huu wa fedha tutafanya zaidi"

Kwa upande Mwingine mkurugenzi Mabelya amewashukuru na kuwapongeza watumishi kwa kujitoa katika kutekeleza majukumu yao ,kwani kujitoa huko ndiko kuliko sababisha mafanikio hayo,

Mkurugenzi Mabelya amekua na utaratibu wa kukutana na vyombo vya Habari mara kwa mara na kuelezea mafanikio na mikakati mbalimbali ya manispaa ili kuhakikisha uwazi unakuwepo na Wananchi wanajua mipango na mafanikio ya Manispaa yao.