TEMEKE YADHAMIRIA KUMALIZA TATIZO LA UKOSEFU WA MADAWATI MASHULENI

Posted on: January 24th, 2025

Mstahiki Meya wa Halmashauri ya Manispaa ya Temeke Mhe. Abdallah Mtinika akiambatana na Mwenyekiti wa Kamati ya huduma za Jamii Mhe. Mariam Juma Mtemvu ambaye pia ni Diwani wa Viti maalum Manispaa ya Temeke leo Januari 24, 2025 wamepokea Madawati takribani 6000 yatakayokwenda kusambazwa katika Shule za Msingi zilizopo ndani ya Manispaa hii.

Akizungumza katika zoezi hilo Meya Mtinika amepongeza jitihada za Waheshimiwa Madiwani na Watendaji kuhakikisha mpango wa utengenezaji wa madawati unatekelezwa

"Madawati haya ni mpango wetu kama halmashauri kuyatengeneza ili kumaliza tatizo la ukosefu wa madawati mashuleni. Nikiwa nazindua zoezi hili, nawaagiza watendaji husika madawati haya yanapokamilika tu yapelekwe katika shule zilizokusudiwa. Lengo letu baada ya kupitisha mpango wa madawati 30,000 kwa shule za msingi tunaamini yatakwenda kupunguza ama kumaliza tatizo"

Akitoa taarifa juu ya idara ya elimu msingi Mkuu wa idara hiyo Ndg. Mshana Kawia ameeleza kuwa Manispaa ya Temeke kupitia Mapato ya ndani ya halmashauri imejipanga kupunguza tatizo la ukosefu wa madawati kwa shule zote 88 za msingi kwa kuanza kusambaza madawati 6000 yaliyokamilika.

Manispaa ya Temeke inaendelea kupokea mabadiliko makubwa katika idara ya elimu msingi na sekondari kupitia maboresho ya miundombinu ya ujenzi (vyumba vya madarasa na matundu ya vyoo), utengenezaji wa madawati kwa shule za msingi pamoja na viti na meza kwa Sekondari.