TEMEKE YAENDELEA KUWAWEZESHA WANAFUNZI WANAOTOKA KWENYE MAZINGIRA MAGUMU

Posted on: September 24th, 2025

Manispaa ya Temeke imeendelea kutekeleza awamu ya pili ya mpango wa kuwasaidia Wanafunzi wanaoishi katika mazingira magumu ambapo Septemba 24,2025 Wanafunzi 82 wamepatiwa mahitaji muhimu ya shule ikiwemo sare za shule (uniform), begi, madaftari 6, jozi ya viatu, soksi, peni, penseli nakadhalika baada ya awamu ya kwanza iliyofanyika mwezi Mei ambapo jumla ya Wanafunzi 80 walipatiwa vifaa.

Akizungumza katika hafla hiyo kaimu Mkurugenzi wa manispaa ya Temeke Yahya Madenge amesema

“Watoto hawa wanapatiwa seti nzima wanayohitaji ili kuwawezesha kufika na kusoma vizuri wakiwa shule, vifaa hivi vinatokana na pesa kutoka Serikalini (Tamisemi na mapato ya ndani ya Halmashauri) maana ya haya yote ni kwamba mhe. Rais Samia Suluhu Hassan anawajali na anawajibika kwa ajili yenu, anatamani kuendelea kuwapunguzia mzigo ili jukumu lenu libaki kuwasimamia watoto wasome kwa bidii” Aidha mkurugenzi Madenge aliongeza kuwa tarajio la Serikali baada ya kugawa vifaa hivyo ni kuona watoto wanakwensa shule vizuri (mahudhurio) na kuwataka kuwasaidia Watoto kuvitunza vifaa hivyo.

Aidha Afisa elimu Samwel Mshana amesema

“Tuliona badala ya kuwapa chakula tuwape mahitaji muhimu ya shule ili kuwawezesha kusoma na mzazi apunguziwe mzigo wa kununua vifaa kutokana na hali ya maisha, wazazi muone namna gani Serikali yenu inawajali na sasa jukumu lenu ni kuweka mkazo na msukumo ili watoto hawa wasome kwa juhudi.”

Zainab Ramadhan, mwanafunzi wa darasa la sita, alipokea msaada huo kwa furaha na kuahidi kuvitumia vizuri vifaa hivyo na kuahidi kufaulu vizuri.