''Tuendelee Kuwaelimisha Wananchi juu ya Usalama na Umuhimu wa Kuchanjwa'' Mratibu wa Chanjo Temeke.

Posted on: November 10th, 2021

"Tuendelee Kuwaelimisha Wananchi juu ya Usalama na Umuhimu wa Kuchanjwa."Mratibu wa Chanjo Temeke. Mratibu wa chanjo wilaya ya Temeke ndugu Jumanne Kagoda amewataka wajumbe wa kamati ya Amani kuendelea  kuwaelimisha Wananchi juu ya usalama na umuhimu wa kuchanjwa, waondoe woga, wajitokeze kuchanjwa ili kujikinga na maambukizi ya UVIKO 19.

Kagoda ametoa rai hiyo leo Novemba 10,2021 wakati wa kikao cha Tathmini ya UVIKO 19 na kupokea taarifa ya  utoaji wa chanjo dhidi ya ugonjwa huo Kiwilaya.Kikao ambacho kimeendeshwa na mkuu wa wilaya ya Temeke Mheshimiwa Jokate Mwegelo.

Na  kuhudhuriwa na Mkurugenzi wa halmashauri ya manispaa ya Temeke ndugu Elihuruma Mabelya  na kaimu mganga mkuu  wilaya ya Temeke daktari Projest Mtasigwa.

Akizungumza wakati akitoa taarifa ya hali ya UVIKO 19 na zoezi la utoaji chanjo,

Kagoda amesema

"Tangu Agosti 3-21,2021 tumechanja jumla ya watu 20,049 kati yao wanaume 12,510 na wanawake 7,539 kwa chanjo ya Jansen na kuanzia Oktoba 22 hadi  Novemba 09,watu 912 wamechanjwa kati yao wanaume ni 472, wanawake 440 kwa chanjo ya Sinopharm.

Tumeendelea kuongeza vituo kufikia 62, kutoa huduma tembezi (outreach), tunatumia vituo vya afya na ofisi za Umma kuweka matangazo ili kuhamasisha Wananchi kupata chanjo".

Aidha Kagoda amesema kwamba zoezi la chanjo  kwa awamu ya pili linaendelea, na kwamba nia ya Serikali ni  kuwakinga Wananchi wake dhidi ya UVIKO 19. 

"Kwa awamu ya pili tunatakiwa kuchanja watu 600,057 ambayo ni asilimia 60% ya lengo.  Chanjo itakayotumika ni Sinopharm,  dozi mbili kwa kila mteja, tofauti na ilivyokuwa awali ambapo dozi ilikua moja kwa chanjo ya Jansen. Tuendelee  kuwaelimisha Wananchi juu ya usalama na umuhimu wa kuchanjwa,ili kujikinga dhidi ya  UVIKO 19.Watu wasiogope, tunashirikiana kwa karibu na TMDA kufuatilia hali za waliochanjwa na kuwasaidia endapo kuna hali tofauti".

Serikali kupitia wizara ya Afya inaendelea na zoezi la utoaji wa chanjo ya UVIKO 19 kwa watu wenye umri kuanzia miaka 18, lengo likiwa ni  kupunguza athari,pamoja na kukinga Wananchi dhidi ya maambukizi ya virusi vya Korona.