TUNATAKA KUACHA ALAMA NZURI: NAIBU MEYA TEMEKE

Posted on: September 28th, 2022

Na Shalua Mpanda

Naibu Meya wa manispaa ya Temeke Mhe. Arnold Peter leo Septemba 28,2022 ameendesha kikao cha baraza la Madiwani kilichojadili hesabu za mwisho za Manispaa kwa mwaka wa fedha ulioishia tarehe 30,Juni 2022.

Akizungumza katika kikao hicho kilichohudhuriwa pia na wakuu wa idara na vitengo wa Manispaa hiyo,Mhe.Peter amesema wao kama wawakilishi wa Wananchi wanapaswa kuacha "alama" katika utumishi wao.

Naibu Meya huyo ambaye kwenye kikao hicho alikuwa Mwenyekiti,amesema manispaa ya Temeke inahitaji kuwa na vitega uchumi vyake ambavyo vitakuwa chanzo cha uhakika cha mapato ya Manispaa hiyo.

"Niwapongeze kwa maandalizi ya ripoti hii nzuri ambayo kwa matarajio mazuri na hii inaonesha ni jinsi gani mmejiandaa niwashukuru pia kwa uwasilishaji mzuri".Alisema Mhe.Arnold

Awali akichangia hoja katika kikao hicho,diwani wa kata ya Kilungule Mhe.Saidi Fella alitaka kujua katika mgawanyo wa mali mara baada ya kugawanywa kwa wilaya ya Temeke na Kigamboni,manispaa

ya Temeke ilipata zipi.

"Mheshimiwa Mwenyekiti,mimi napata kigugumizi kuelewa,mwanzoni kabla ya kugawa wilaya ya Kigamboni na Temeke,lile jengo la Mkuki(Mkuki house) lilikuwa huku kwetu,nataka kufahamu sisi sasa hivi tumebaki na nini?".Alisema Mhe.Fella.

Mara baada ya majadiliano hayo Madiwani hao walipitisha hoja zote huku kikao hicho pia kikitoka na maazimio mawili mojawapo likiwa ni kuandaa kikao maalum cha kujadili masuala ya uwekezaji.