WAATHIRIKA 1300 WA MADAWA YA KULEVYA WAPATIWA HUDUMA YA METHADONE KWA SIKU TEMEKE

Posted on: February 3rd, 2023

Na: Nassoro Rashid   TMC Habari

Leo Februari 3, 2023 Mwenyekiti wa Kamati ya Kudhibiti UKIMWI Manispaa ya Temeke ambaye pia ni Naibu Meya wa Halmashauri Mhe. Anorld Peter ameongoza kamati hiyo katika ziara ya kutembelea vituo vya utoaji wa huduma ya afya ya akili na methadone  vilivyopo katika Manispaa hii.

Akizungumza wakati akiwa katika kituo cha Methodone kilichopo katika hospitali ya Rufaa ya mkoa  Temeke, Mhe. Anorld ameupongeza uongozi wa kituo hicho kwa utoaji wa huduma bora na za kisasa kwa waathirika hao ambao mpaka sasa kituo hicho kimefanikiwa kuwasajili waathirika 2904 kwa ajili ya huduma hizo.

"Kipekee niwapongeze sana Mganga Mfawidhi na jopo lako lote, watu 1300 wanapewa huduma kwa siku si idadi ndogo, na Serikali imejipambanua kutoa huduma bora kwa Wananchi wake, mmetueleza hapa kwamba  mmetoka kwenye mfumo wa kizamani na sasa mpo mfumo wa kisasa wa kutoa huduma, lakini kupokea wagonjwa  2904 sio mchezo, sisi kama kamati lazima tuwape nguvu ya kuwahudumia Wananchi hao." Alisema Mhe. Anorld.

Akijibu hoja ya Mganga Mfawidhi kuhusu changamoto ya eneo kwa ajili ya ujenzi wa majengo ya utoaji wa huduma za mikojo, usafishaji wa figo pamoja na damu,Mhe. Anorld amesema,

"Kuna changamoto mmezisema hatuwezi kuzijibia hapa, ila tunazibeba ili tuzipeleke katika vikao tuweze kujadili kwa pamoja, wapo Madiwani hapa, tutakwenda kupata ushauri wa Menejimenti na kuweza kuamua, huu mradi wa kusafisha figo, damu na huduma za mkojo ni mzuri sana lakini mmekosa eneo, hivyo tunawaahidi kulifanyia kazi hili ili tupate mwafaka." Alisema Mhe. Anorld

Aidha Mhe. Anorld amesema  kwamba suala  la uongozi kuwatafutia fursa na shughuli mbalimbali za kufanya wagonjwa ambao wanaonesha mwelekeo mzuri wa kupona ili kuwaondoa katika vishawishi vya kurudia matumizi ya madawa ya kulevya ni maono mazuri,yapaswa kuigwa na kupewa nguvu.