WATAALAM KUTOKA IDARA YA MAENDELEO YA JAMII WATOA MAFUNZO YA KUJENGA UELEWA KWA VIONGOZI WA DINI

Posted on: October 19th, 2023

Na: Sweetbetter Njige

       TMC Habari

Taasisi ya Kimataifa inayojishughulisha na masuala ya Usawa wa Kijinsia ya UN Women imeendesha semina ya  kujenga uelewa na utetezi kwa viongozi wa dini juu ya ushirikishwaji wa Wanawake katika uongozi na haki za kiuchumi.

Semina hiyo imefanyika leo Oktoba 19,2023 katika shule ya msingi Bahati na kusimamiwa na wawezeshaji wataalam kutoka manispaa ya Temeke huku wakiwasihi viongozi wa dini kuisaidia Jamii kuondokana na uelewa duni juu ya haki za Wanawake.

Akizungumza katika semina hiyo afisa Maendeleo ya jamii manispaa ya Temeke Bi. Herrieth Kamara amesema semina hiyo inalenga kujenga uelewa kwa viongozi hao ili wakaisaidie jamii kubadili mtazamo juu ya uwezo wa mwanamke katika masuala ya uongozi na uchumi.

"Tumefanya semina hii kuwajengea uwezo viongozi wa dini ambayo kimsingi imewezeshwa na UN Women....tunaamini watarudi katika maeneo yao (Kanisani na Misikitini) kuwasaidia waumini kuelewa uwezo wa Mwanamke katika nyanja mbalimbali hasa katika Uongozi na Uchumi" Alisema Bi.Herieth

Kwa upande wao viongozi wa dini kupitia mwakilishi ndugu Robert Ibrahim wamewapongeza waandaaji wa semina hiyo na kuahidi kufikisha ujumbe sahihi kwa jamii.

"Leo tumejifunza vitu vingi ambavyo tunaona inapaswa kwenda kuelimishana ili kuelewa na kuthamini haki za mwanamke badala ya kumtazama tu(mwanamke) kwa namna alivyo".Alisema kiongozi huyo

Semina hiyo itaendelea kufanyika katika maeneo mbalimbali ili kuleta uelewa wa pamoja wa jamii juu ya ushirikishwaji wa Wanawake katika nyanja tajwa.